ނެޝަނަލް ޑްރަގް
އެޖެންސީގައި ފަރުވާ ހޯދަމުންދާ މީހުން އިޖްތިމާޢީ ޙަރަކާތްތަކަށް
އަހުލުވެރިކުރުމުގެ ގޮތުން، ކޮމިއުނިޓީ ފަރުވާގައި ހިމެނުމަށް ނިންމާފައިވާ
"އިޖްތިމާޢީ ޚިދުމަތް" މިއަދު ފަށައިފިއެވެ.
ނެޝަނަލް ޑްރަގް އެޖެންސީގެ
ސީއީއޯ ހަސަން ޝަހީލް ވިދާޅުވީ އިޖްތިމާޢީ ޚިދުމަތަކީ، ފަރުވާ ހޯދަމުންދާ މީހުން
އިޖްތިމާޢީ ޙަރަކާތްތަކަށް އަހުލުވެރިކޮށް އެމީހުންނަކީ މުޖުތަމަޢުގައި ބޭނުންތެރި
އަދި މުޖުތަމަޢަށް އެމީހުންގެ ފަރާތުން ޒިންމާތަކެއްވާ ބައެއްކަން އަންގައިދީ،
މުޖުތަމަޢަށް އަލުން އަނބުރާ ނުކުރުތުމަށް ހުރި ގޮންޖެހުންތައް ކުޑަކުރުމުގެ
ގޮތުން ހިންގޭ ޙަރަކާތެއްކަމަށެވެ. މިޙަރަކާތާއި އެކު ޑްރަގް އެޖެންސީގެ ކޮމިއުނިޓީ
ފަރުވާ ހޯދަމުންދާ ކޮންމެ މީހަކުވެސް 6 ގަޑިއިރުގެ އިޖްތިމާޢީ ޚިދުމަތް
ފުރިހަމަކުރަންޖެހޭނެކަމަށެވެ. އެގޮތުން މަހަކު އެއްފަހަރު އިޖްތިމާޢީ ޚިދުމަތެއް
ފޯރުކޮށްދެވިގެންދާނެކަމަށް ޝަހީލް ވިދާޅުވިއެވެ.
އިޖްތިމާޢީ
ޚިދުމަތުގެ ފުރަތަމަ ޙަރަކާތެއްގެ ގޮތުގައި ނެޝަނަލް ޑްރަގް އެޖެންސީގެ
މުވައްޒަފުންނާއި އެތަނުގެ ކޮމިއުނިޓީ ފަރުވާ ހޯދަމުންދާ މީހުން ގުޅިގެން އާޓިފިޝަލް
ބީޗް ސަރަޙައްދު ސާފުކުރުމުގެ ޙަރަކާތެއް މިއަދު ހެނދުނު ވަނީ ކުރިއަށްގެންގޮސްފައެވެ.
މިޙަރަކާތުގައި ޑްރަގް އެޖެންސީގެ މުވައްޒަފުންނާއި އެތަނުން ފަރުވާ ހޯދަމުންދާ 25
މީހަކު ވަނީ ބައިވެރިވެފައެވެ.