ސްވިޒަލޭންޑާއި އިންޑިއާއަށް ރާއްޖެއިން މަސް އެކްސްޕޯޓްކުރުމުގެ މަސައްކަތް ކުރަމުންދާކަމަށް މިފްކޯއިން ވިދާޅުވެއްޖެއެވެ. މިފްކޯއިން މިހާރުވެސް ދަނީ ޔޫރަޕްގެ ބައެއް މާކެޓްތަކަށް މަސް އެކްސްޕޯޓްކުރަމުންނެވެ.
ރާއްޖެއިން އެކްސްޕޯޓްކުރާ ބާވަތްތަކުގެ ބޮޑު ބައެއް ހިއްސާކުރަނީ މަހުގެ ބާވަތްތަކެވެ. މިއަހަރުގެ އޮގަސްޓް މަހުވެސް ރާއްޖެއިން 97 މިލިއަން ރުފިޔާގެ މަސް ވަނީ އެކި ޤައުމުތަކަށް އެކްސްޕޯޓްކޮށްފައެވެ. ރާއްޖޭގެ ކަނޑުމަހަކީ ދުނިޔޭގެ އެހެން ޤައުމުތަކުގައި ޑިމާންޑް ބޮޑު މަހެކެވެ.
މިފްކޯއިން ދަނީ އައު މާކެޓްތައް ހޯދައި މަސް އެކްސްޕޯޓްކުރުމުގެ މަސައްކަތް ކުރަމުންނެވެ. ޕީއެސްއެމް ނިއުސްއަށް މައުލޫމާތުދެއްވަމުން މިފްކޯގެ ސީއީއޯ އިސްމާއިލް ފައުޒީ ވިދާޅުވީ، މިހާރުވެސް އިތުރު މާކެޓްތައް ބަލަމުންދާކަމަށެވެ. އޭގެތެރޭގައި ސްވިޒަލޭންޑް އަދި އިންޑިއާގެ މާކެޓް އޭނާ ފާހަގަކުރެއްވިއެވެ.
"މިހާރުވެސް އަޅުގަނޑުމެން އިތުރު މާކެޓްތައް އެކްސްޕްލޯރ އެބަ ކުރަން. ޔޫރަޕްގެ ޑިއުޓީ އިނާއަތްތައް ލިބޭ ޤައުމުތަކަށްވެސް އަޅުގަނޑުމެން މަސައްކަތް އެބަ ކުރަން. އޭގެތެރޭގައި ސްވިޒަލޭންޑް ފަދަ ތަންތަންވެސް މީގެތެރޭގައި އެބަ ހިމެނޭ. ޙާއްސަކޮށް މިޑުލް އީސްޓް މާކެޓަކީވެސް އަޅުގަނޑުމެންނަށް އެކްސްޕްލޯރ ކުރެވިދާނެ މާކެޓެއް. އަދި އިންޑިއާ މާކެޓްވެސް އެބައުޅޭ." އިސްމާޢީލް ފައުޒީ ވިދާޅުވިއެވެ.
މިފްކޯއިން މިހާރު ގިނައިން މަސް އެކްސްޕޯޓްކުރަމުން ދަނީ ޔޫރަޕްގެ މާކެޓަށެވެ. އެހެންނަމަވެސް އިސްމާޢީލް ވިދާޅުވީ، އިންޑިއާގެ މާކެޓް ދިރާސާކުރިއިރު އެ ޤައުމުގައި ކަނޑުމަސް ކާމީހުންގެ އާބާދީއެއް އެބައޮތްކަމަށެވެ. އެހެންކަމުން އިންޑިއާ މާކެޓަކީ ކާމިޔާބު މާކެޓަކަށް ވާނެކަމަށް އުންމީދުކުރައްވާކަމަށް އޭނާ ވިދާޅުވިއެވެ.
މިދިޔަ މަހު ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް އިންޑިއާއަށް ކުރެއްވި ދަތުރުފުޅުގައި ރާއްޖޭގެ މަހުގެ އުފެއްދުންތައް އިންޑިއާއަށް އެކްސްޕޯޓްކުރުމުގައި ނަގަމުން އައި ޑިއުޓީ ވަނީ ކަނޑާލާފައެވެ. މި ޑިއުޓީ ކަނޑާލާފައިވަނީ ދިވެހި ސަރުކާރާއި، ސައުތް އޭޝިއަން ފްރީ ޓްރޭޑް އޭރިއާ (ސަފްޓާ) އާއެކު ކުރެވުނު މަޝްވަރާތަކަށްފަހުއެވެ.
މި ދަތުރުފުޅުގައި ޕީއެސްއެމް ނިއުސްއަށް މައުލޫމާތުދެއްވަމުން އިކޮނޮމިކް މިނިސްޓަރ ފައްޔާޟު އިސްމާޢީލް ވިދާޅުވެފައިވަނީ ރާއްޖޭގެ މަހުގެ އުފެއްދުންތަކަށް ނަގަމުން އައި ޑިއުޓީ ސަފްޓާގެ އެހީގައި ކަނޑާއެލުވުމަކީ ލިބުނު ކާމިޔާބީއެއްކަމަށެވެ. މިކަމުގެ ސަބަބުން ރާއްޖޭގެ މަހުގެ އުފެއްދުންތަކަށް އިންޑިއާގައި މާކެޓްކޮށް ރަނގަޅު އާމްދަނީއެއް ހޯދުމަށް ފުރުޞަތު ލިބިގެންދާނެކަން މިނިސްޓަރ ވަނީ ފާހަގަކުރައްވާފައެވެ.
މިފްކޯއިން ވިދާޅުވީ އެ ކުންފުނިން އުންމީދު ކުރަނީ ރާއްޖޭގެ މަހަށް ހަމައަގު ހޯދާފައި، އުފެއްދުންތެރިކަން އިތުރުކޮށްފައި ރޯމަހުގެ ގޮތުގައި އެކްސްޕޯޓްކުރާ ޢަދަދު މަދުކޮށްފައި، ރާއްޖޭގެ މަސް ރާއްޖޭގައި ހިފެހެއްޓިފައި އެއަށް ރަނގަޅު އަގެއް މަސްވެރިންނަށް ފޯރުކޮށްދިނުންކަމަށެވެ.
މިފްކޯއިން ވަނީ މިދިޔަ 3 އަހަރުގައިވެސް އައު މާކެޓްތަކަށް މަސް އެކްސްޕޯޓް ކޮށްފައެވެ. އެގޮތުން ވިއެޓްނާމް، ނޯތް އެމްރިކާ، މޮރިޝަސް، ފަރަންސޭސިވިލާތް، ޖަރުމަނުވިލާތް ފަދަ ޤައުމުތަކަށް މިހާރުވެސް ދަނީ މަސް އެކްސްޕޯޓްކުރަމުންނެވެ.