ދިވެހި ސެކިއުރިޓީ އޮފިސަރުން ތަމްރީންކުރުމަށް އިކޮނޮމިކް މިނިސްޓްރީއާ ފުލުހުންނާ ދެމެދު އެއްބަސްވުމެއް

ސެކިއުރިޓީ އޮފިސަރުންގެ ގޮތުގައި ތަމްރީން ލިބިފައިވާ ދިވެހިން ވަޒީފާއަށް ނެރުމަށް، މިނިސްޓްރީ އޮފް އިކޮނޮމިކް ޑިވެލޮޕްމަންޓާއި ފުލުހުން ގުޅިގެން ތަމްރީން ޕްރޮގްރާމެއް ފެށުމުގެ އެއްބަސްވުމެއްގައި ސޮއިކޮށްފިއެވެ.

މި އެއްބަސްވުން ޤާއިމުކޮށްފައިވަނީ މިނިސްޓްރީ އޮފް އިކޮނޮމިކް ޑިވެލޮޕްމަންޓާއި މޯލްޑިވްސް ޕޮލިސް ސަރވިސްގެ ދަށުން ހިންގާ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓާ ދެމެދުއެވެ. ދެފަރާތުގެ ދެމެދު އެއްބަސްވެފައިވަނީ ސެކިއުރިޓީ އޮފިސަރސް އިނިޝިއަލް ޓްރެއިނިން ޕްރޮގްރާމެއް، އަންނަ މަހުގެ ތެރޭގައި ފެށުމަށެވެ.

މި ޕްރޮގްރަމްގެ މަޤުސަދަކީ ސެކިއުރިޓީގެ ދާއިރާއިން ކުރިއަށް ދާން ބޭނުންވާ މީހުންނަށް ފުރުޞަތު ހުޅުވައިދީ، މި ދާއިރާގައި ދިވެހިންގެ ބައިވެރިވުން އިތުރުކުރުމެވެ. އަދި މި ދާއިރާއަށް ބޭނުންވާ ދިވެހިން މުވައްޒަފުން ތަމްރީންކޮށް، ދިވެހިންނަށް ފުރުޞަތު ލިބުމުގައި ހުރި ދަތިތައް ނައްތާލުމެވެ. ސެކިއުރިޓީ އޮފިސަރުންގެ ގޮތުގައި މިހާރު ގިނައިން މަސައްކަތް ކުރަނީ ބިދޭސީންނެވެ.

މި ޕްރޮގްރާމްގެ ފުރަތަމަ ފިޔަވަހީގައި 30 ސެކިއުރިޓީ އޮފިސަރުން ތަމްރީންކުރުމަށް ވަނީ ހަމަޖެހިފައެވެ. ދެ ހަފްތާގެ މި ޕްރޮގްރާމް ކުރިއަށްގެންދާނީ ދ.ވާނީގައެވެ. މިއީ ސަރުކާރުން %100 ފަންޑުކޮށްގެން ކުރިއަށްގެންދާ ޕްރޮގްރާމެކެވެ.

އިކޮނޮމިކް މިނިސްޓްރީން ވިދާޅުވީ ސެކިއުރިޓީ ދާއިރާއަކީ ޕްރޮފެޝަންއެއްގެ ގޮތުގައި ދިވެހިރާއްޖޭގައި ކުރިއަރުވަމުން އަންނަ އަދި ގިނަގުނަ ފުރުޞަތުތައް ހުރި ދާއިރާއެއްކަމަށެވެ. މި ދާއިރާއަށް ދިވެހި މަސައްކަތްތެރިން ތަމްރީންކޮށް ވަޒީފާގެ ބާޒާރަށް ނެރުމަކީ ސަރުކާރުގެ ވަރަށް ބޮޑު ޢަމާޒެއްކަމަށެވެ. ފުލުހުންނާއެކު ކުރިއަށްގެންދާ މިޕްރޮގްރާމްގެ ސަބަބުން މި ދާއިރާއިން އިތުރަށް ކުރިއަށް ދިއުމުގެ ފުރުޞަތު ފަހިވެގެންދާނެއެވެ.

މިތަމްރީން ޕްރޮގްރާމްގައި ބައިވެރިވާން ބޭނުންވާ މީހުންނަށް، jobcenter.mv މެދުވެރިކޮށް ފޯމް ހުށައެޅޭނެއެވެ.

އެޕްލިކޭޝަން ހުށައެޅުމުގެ ފުރުޞަތު އޮކްޓޯބަރު 13 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.