ހުޅުމާލޭގައި ކެފޭ ކޯޓެއް ތަރައްޤީކުރަން ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީން ބަޔަކާ ހަވާލުކޮށްފިއެވެ. ހުޅުމާލޭގައި ކެފޭ ކޯޓެއް އެޅުމަށް އެޗް.ޑީ.ސީން ހަވާލުކޮށްފައިވަނީ ފެޑޯއާއެވެ.
އެޗް.ޑީ.ސީން ދޫކޮށްފައިވަނީ މިތަން ތަރައްޤީކުރާނެ ބިމެވެ. އެހެންކަމުން ތަން ތަރައްޤީކޮށް ހިންގާނީ ފެޑޯއިންނެވެ. މިއީ 3 ފަންގިފިލާގެ ކެފޭ ކޯޓެކެވެ. މިތަން ތަރައްޤީކުރަނީ 6 ކެފޭ ރެސްޓޯރަންޓް ހުންނާނެގޮތަށެވެ. އަދި އައުޓްޑޯ ޑައިނިންގ އޭރިއާއަކާއި، އިވެންޓް ބޭއްވޭނެ ޓެރަސްއަކާއި، ޕާކިން އޭރިއާއެއްގެ އިތުރުން ސްވިމިންގ ޕޫލްއެއް ހުންނާނެއެވެ.
Savor by FEDO Café Court is a brand new development by FEDO advancing in Hulhumalé. Designed low rise and sustainable, we are eagerly waiting for this development. #MyHulhumalé pic.twitter.com/GoJh9DRqAx
— HDC (@hdcmaldives) September 12, 2022
މިތަން ތަރައްޤީކުރަނީ ހުޅުމާލޭ ލޮޓް ނަންބަރ 11617 ގައެވެ. އެއީ ޓްރީޓޮޕް ހޮސްޕިޓަލް ކައިރިއެވެ. މިތަނުގެ އެއްބަސްވުމުގައި އެޗް.ޑީ.ސީއާއި ފެޑޯއިން ސޮއިކޮށްފައިވަނީ 7 ޑިސެމްބަރ 2020 ގައެވެ. މިތަން ނިންމުމަށް އެޗް.ޑީ.ސީން ދީފައިވާ ތާރީޚަކީ އަންނަ އަހަރުގެ އޮގަސްޓްގެ ނިޔަލަށެވެ.
ހުޅުމާލޭގައި މިހާރު ހަލުވިކަމާއިއެކު އާބާދީ އަންނަނީ އިތުރުވަމުންނެވެ. އެހެންކަމުން އެތަނަށް ބޭނުންވާ ވަސީލަތްތައް ޤާއިމްކޮށްދިނުމުގެ މަސައްކަތް އެޗް.ޑީ.ސީން އަންނަނީ ކުރަމުންނެވެ.