އަމީނީ މަގު ޒަމާނީ ފެންވަރަށް ތަރައްޤީކުރުމުގެ މަސައްކަތް ރޯޑް ޑިވެލޮޕްމަންޓް ކޯރޕަރޭޝަން، އާރް.ޑީ.ސީން ފެށުމާގުޅިގެން، އެމަގުން މިނީ ބަސް ދަތުރުކުރާ ރޫޓަށް ބަދަލުތަކެއް އެމް.ޓީ.ސީ.ސީން ގެނެސްފިއެވެ.
އަމީނީމަގު ތަރައްޤީކުރުމުގެ މަސައްކަތް ކުރިއަށްގެންދިއުމަށް ހަމަޖެހިފައިވަނީ ސެގްމެންޓްތަކަކަށް ބަހާލައިގެންނެވެ. އެގޮތުން ފުރަތަމަ ސެގްމަންޓުގެ މަސައްކަތް އާރް.ޑީ.ސީން މިހާރު އަންނަނީ ކުރަމުންނެވެ. މި ސެގްމަންޓުގެ މަސައްކަތް ކުރިއަށްގެންދިއުމަށްޓަކާ ހޭންވާރު ސަރަޙައްދުން ބޮޑުތަކުރުފާނުމަގާއި އަމީނީމަގު ގުޅޭ ހިސާބުން ފެށިގެން އިރުދޭމާ ހިނގުމާއި ހަމައަށް ވަނީ ބަންދުކޮށްފައެވެ.
އެމް.ޓީ.ސީ.ސީގެ "ރާއްޖެ ޓްރާންސްޕޯޓް ލިންކް"ގެ ދަށުން މާލޭ ސިޓީގައި މިނީބަހުގެ ޚިދުމަތް މިމަހުގެ 6 ވަނަ ދުވަހު ދޭން ފަށާފައިވާއިރު، އަމީނީ މަގަކީ މިނީ ބަސްތައް ދަތުރުކުރުމަށް ބޭނުންކުރާ މައި އެއް ރޫޓެވެ. އެހެންކަމުން މަގުހެދުމުގެ މަސައްކަތް ކުރިއަށްދާވަރަކުން އަމީނީ ރޫޓަށް ގެންނަންޖެހޭ ބަދަލުތައް ގެނެސް، އެކަން ހާމަކުރަމުންދާނެކަމަށް އެމް.ޓީ.ސީ.ސީން މީގެކުރިން ވިދާޅުވެފައިވެއެވެ.
އެގޮތުން އަމީނީ މަގުގެ ފުރަތަމަ ސެގްމަންޓުގެ މަސައްކަތަށް ބައެއް ބަންދުކޮށްފައިވާތީ، އާމީނީ މަގުގެ އެ ސަރަޙައްދުގެ ދެ ބަސް ސްޓޮޕަކަށް ދަތުރުކޮށް މަޑުކުރުން ވަގުތީގޮތުން މެދުކަނޑާލާފައިވާކަމަށް އެމް.ޓީ.ސީ.ސީން ވިދާޅުވެއެވެ. އެ 2 ސްޓޮޕަކީ ދަރުބާރުގެ (R11-12) އަދި ކުޑަކުދިންގެ ބަގިޗާ (R11-13) ސްޓޮޕެވެ. މިބަދަލު މިގޮތަށް ގެނައިނަމަވެސް، އަމީނީ ރޫޓުގެ ދަތުރުތައް މެދުނުކެނޑި ކުރިއަށްދާނެކަމަށް އެކުންފުނިން ވިދާޅުވެއެވެ.
Customer Announcement! pic.twitter.com/Bs4lpzFkOg
— MTCC Plc (@MTCCPlc) September 12, 2022
މާލޭގައި މިނީ ބަހުގެ ޚިދުމަތް ދޭން ފެށިތާ ހަފްތާއެއް ވެފައިވާއިރު، މި ޚިދުމަތް ހޯދާ މީހުންގެ ޢަދަދު ދުވަހުން ދުވަހަށް އިތުރުވެ، ޚިދުމަތަށް އޮންނަ ޑިމާންޑް ބޮޑުވަމުންދާކަން އެމް.ޓީ.ސީ.ސީން ފާހަގަކުރައްވައެވެ. މި މަހުގެ 6 އިން ފެށިގެން ފުރަތަމަ 2 ހަފްތާގައި މި ޚިދުމަތް ހިލޭ ލިބިގެންދާނެއެވެ. އެއަށްފަހު ދަތުރަކަށް 7 ރުފިޔާ ނަގާނެއެވެ. އެހެންނަމަވެސް ސްކޫލް ކުދިންނާއި، 65 އަހަރުން މަތީގެ މީހުންނާއި ޚާއްސަ އެހީއަށް ބޭނުންވާ ފަރާތްތަކަށް މި ޚިދުމަތް ހިލޭ ލިބިގެންދާނެއެވެ.
މިނީ ބަހުގެ ޚިދުމަތައް މާލޭގައި ބޭނުންކުރަމުން އަންނަނީ މައިގަނޑު 3 ރޫޓެކެވެ. އެއީ އޯކިޑް ރޫޓާއި، ސޯސަން ރޫޓުގެ އިތުރުން އަމީނީ ރޫޓެވެ. މި 3 ރޫޓު މެދުވެރިކޮށް ޖުމްލަ 40 ތަނަކަށް ބަސްތައް ހުއްޓާނެއެވެ. އަދި ކޮންމެ 10 މިނެޓަކުން ބަސް ދަތުރުކުރާގޮތަށް ޝެޑިއުލްކޮށްފައިވާއިރު، ކޮންމެ ދުވަހެއްގެ ހެނދުނު 5:45 އިން ފެށިގެން ދަންވަރު 12:15 އާއި ހަމައަށް މި ޚިދުމަތް ލިބިގެންދާނެއެވެ. މާލޭގައި މިނީ ބަހުގެ ޚިދުމަތުގައި ޖުމްލަ 18 ބަހެއް އެމް.ޓީ.ސީ.ސީން ދަނީ ބޭނުންކުރަމުންނެވެ.