މުލަކަތޮޅު މުލީ ރީޖަނަލް ހޮސްޕިޓަލަށް އިތުރު ޑޮކްޓަރުންނާއި، ވަސީލަތް ފޯރުކޮށްދީ އައު ޢިމާރާތް ތަރައްޤީ ކޮށްދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މުލީ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
މ.މުއްޔަކީ އަތޮޅުގެ ވެރިކަންކުރާ ރަށެވެ. އެރަށުގައި ހުންނަ ރީޖަނަލް ހޮސްޕިޓަލަކީ މުޅި ސަރަހައްދުގެ ހުރިހާ ރައްޔިތުން ސިއްޙީ ޚިދުމަތަށް ބަރޯސާވާ ހޮސްޕިޓަލެވެ. ނަމަވެސް ފާއިތުވި އަހަރުތަކުގައި ހޮސްޕިޓަލުގެ ތަރައްޤީއަށް މާބޮޑު މަސައްކަތެއް ކުރެވިފައިނެތުމުން، އެތަނުން ފޯރުކޮށްދޭ ޚިދުމަތުގެ ފެންވަރު ދަށްވަމުން އައުމަކީ ރައްޔިތުންގެ ވަރަށް ބޮޑު ކަންބޮޑުވުމެކެވެ.
މުލީ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް އިބްރާހީމް މުޙައްމަދު ޞާލިޙް ވަނީ ސަރުކާރުން ސިއްޙީ ދާއިރާ ތަރައްޤީކުރުމަށް ގެންގުޅުއްވާ ސިޔާސަތުގެ ތެރެއިން މުލީ ރީޖަނަލް ހޮސްޕިޓަލް ތަރައްޤީކުރުމަށް ގެންގުޅުއްވާ ވިސްނުންފުޅު ހިއްސާކުރައްވާފައެވެ.
ރައީސްގެ ވާހަކަފުޅުގައި، މުލީ ރީޖަނަލް ހޮސްޕިޓަލަށް އިތުރު ޑޮކްޓަރުންނާއި ވަސީލަތް ބޭނުންވާކަން ފާހަގަކުރެއްވިއެވެ. އަދި ޚިދުމަތުގެ ފެންވަރު މަތިކުރުމަށް އައު ޢިމާރާތްވެސް ބޭނުންވާކަން ފާޙަގަކުރައްވާ ރައީސް ވަނީ އެކަންވެސް ކޮށްދެއްވާނެކަމަށް ވިދާޅުވެފައެވެ.
ރައީސް ވިދާޅުވީ، މުލީ ރީޖަނަލް ހޮސްޕިޓަލް ތަރައްޤީކުރުން ލަސްވީ، ފާއިތުވި ދެއަހަރަކީ ކޯވިޑާއި ގުޅިގެން މަޝްރޫޢުތައް ކުރިއަށްގެންދިއުމަށް ދަތިވި ދެއަހަރަށް ވުމުންކަމަށެވެ. ނަމަވެސް އެދަނޑިވަޅުގައިވެސް މުލީ ރީޖަނަލް ހޮސްޕިޓަލް މުހިންމު ދައުރެއް އަދާކުރިކަމަށާއި، ހެލްތު މިނިސްޓްރީން ހޮސްޕިޓަލް ތަރައްޤީކުރުމަށް ޕްލޭންތަކެއް އެކުލަވާލާފައިވާކަމަށް ރައީސް ވިދާޅުވިއެވެ.
ރައްޔިތުންނާއި ބައްދަލުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ހެލްތު މިނިސްޓަރ އަޙްމަދު ނަސީމް ވިދާޅުވީ، އަންނަ އަހަރުގެ ފުރަތަމަ ކުއާޓަރުގައި މުލީ ރީޖަނަލް ހޮސްޕިޓަލަށް ގެންނަން ބޭނުންވާ ބަދަލުތައް ގެނެސް ނިންމާނެކަމަށެވެ. އެގޮތުން ފެންވަރު ރަނގަޅު ހޮސްޕިޓަލަކަށް އެ ހޮސްޕިޓަލް ބަދަލުކުރާނެކަމުގެ ޔަޤީންކަން ދެއްވަމުން މިނިސްޓަރ ވިދާޅުވީ މިހާރުވެސް ކުރިން ނުލިބޭ ބައެއް ޚިދުމަތްތައް ފަށާފައިވާކަމަށެވެ. މިނިސްޓަރ ވިދާޅުވީ، ހޮސްޕިޓަލްގެ ޚިދުމަތްތައް ތަރައްޤީކުރާނީ ރައްޔިތުންނާއި ކައުންސިލްގެ މަޝްވަރާގެ މަތިންކަމަށެވެ.
މުލީ ރީޖަނަލް ހޮސްޕިޓަލަކީ 30އަހަރުގެ ދިގު މާޒީއެއް އޮތް ހޮސްޕިޓަލެވެ. ހޮސްޕިޓަލްގެ ޖާގަ އިތުރުކޮށް ވަސީލަތްތައް އިތުރުކުރުމަށް މީގެކުރިން މާބޮޑު މަސައްކަތްތަކެއް ކުރިންކޮށްފައިވާ ތަން ފެންނާކަށް ނެތެވެ. ނަމަވެސް އަހަރުތަކަކަށްފަހު ހޮސްޕިޓަލްގެ ޚިދުމަތުގެ ފެންވަރު ރަނގަޅު ކުރުމަށް ސަރުކާރުން ކުރާ މަސައްކަތުގެދަށުން، އަލަށް ފެށި ބައެއް ޚިދުމަތްތަކާއެކު ވޭތުވެދިޔަ ދެތިން އަހަރުތެރޭ ހޮސްޕިޓަލަށް އަންނަ މީހުންގެ އަދަދު އިތުރުވެފައިވާކަން ހޮސްޕިޓަލުން ފާހަގަކުރެއެވެ. އެގޮތުން ކުރިން މެދުކެނޑިފައި އޮތް އެތެރެހަށީގެ ފަރުވާއާއި ރޭޑިއޮލޮޖީގެ ފަރުވާ ފަދަ ޚިދުމަތްތައް ހޮސްޕިޓަލުން ފަށާފައިވާކަން ފާހަގަކޮށްފައިވެއެވެ.
ހޮސްޕިޓަލުގައި މިހާރު ޚިދުމަތް ދެމުން އަންނަނީ، އަންހެނުންގެ ބަލިތަކުގެ ޚާއްޞަ ޑޮކްޓަރަކާއި، ކުޑަކުދިންގެ ބަލިތަކުގެ ޑޮކްޓަރަކާއި، ހޭނައްތާ ޑޮކްޓަރަކާއި، ދަތުގެ ބަލިތަކުގެ ޑޮކްޓަރަކާއި، ސްކޭން ޑޮކްޓަރެއްގެ އިތުރުން އެތެރެހަށީގެ ބަލިތަކުގެ ޚިދުމަތާއި، އޮޕަރޭޝަންގެ ޚިދުމަތެވެ. އަދި ދެ މެޑިކަލް އޮފިޝަލުންވެސް ހޮސްޕިޓަކުގައި އަންނަނީ ޚިދުމަތްދެމުންނެވެ.
ރައްޔިތުންނާއި ބައްދަލުކުރުމަށް ބޭއްވި ރަސްމިއްޔާތުގައި ރައީސް ޞާލިހު ވަނީ، މުލީ ބަނދަރު ތަރައްޤީކުރުމުގެ މަސައްކަތްވެސް ވަރަށް އަވަހަށް ފަށްޓަވާނެކަމަށް ވިދާޅުވެފައެވެ. އަދި ފެނުގެ ނިޒާމް ގާއިމްކުރުން ނިމުމުން މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢު ކުރިއަށްގެންދަވާނެކަމަށާއި، ކުޅިވަރުގެ އިތުރު ވަސީލަތްތަކާއި ސްކޫލަށް އައު އިމާރާތެއް އިތުރުކޮށްދެއްވާނެކަމަށްވެސް ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.