އަންނަ އަހަރުގެ މެދުތެރޭގައި މުލަކަތޮޅު މުލީ އެއަރޕޯޓް ހުޅުވޭވަރަށް ތަރައްޤީކޮށް ނިންމާނެ ކަމަށް އެމްޓީސީސީން ވިދާޅުވެއްޖެއެވެ.
މ.ވޭވަށު ބަނދަރު ހުޅުވުމަށް ބޭއްވި ރަސްމިއްޔާތުގައި ވޭވަށު ބަނދަރާއި މ.އަތޮޅުގެ ތަރައްޤީއަށް އެމްޓީސީސީން ކުރާ މަސައްކަތްތަކާއި ގުޅޭގޮތުން ވާހަކަ ދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ، އަންނަ އަހަރުގެ މެދުތެރޭގައި މުލަކަތޮޅު ރައްޔިތުން އިންތިޒާރުކުރާ މުލީ އެއަރޕޯޓް ތަރައްޤީކޮށް ނިންމާ ޚިދުމަތް ދެވޭވަރުކުރާނެކަމަށެވެ. އަދި އަންނަ އަހަރު މެދުތެރޭގައި މީމު އަތޮޅުގެ ރައްޔިތުންނަށް އެ އެއަރޕޯޓްގެ ފަސޭހަކަން ފޯރުކޮށްދޭނެ ކަމަށް އާޒިމް ވިދާޅުވިއެވެ.
ރައީސް އިބްރާހީމް މުޙައްމަދު ޞާލިޙްގެ ވެރިކަމުގެ މިދައުރުގެ މިހާތަނަށް 9 ބިލިއަން ރުފިޔާގެ ތަރައްޤީގެ މަޝްރޫޢު އެމްޓީސީސީއާއި ހަވާލުކޮށްފައިވާކަން ފާހަގަކުރައްވާ އާޒިމް ވިދާޅުވީ މިއީ އެންމެ ގިނަ ތަރައްޤީގެ މަޝްރޫޢު ހިންގާ ދައުރުކަމަށެވެ. ރައީސް ޞާލިޙްގެ ޒައާމަތަކީ ތަރައްޤީގެ އީދުގެ ޒައާމަތެއްގެ ގޮތުގައި ސިފަކުރައްވާ އާޒިމް ވިދާޅުވީ އެ ތަރައްޤީގެ ފަސޭހަކަން އެތައް ރައްޔިތަކަށް ލިބެމުން އަންކަމަށެވެ.
މުލަކަތޮޅަކީ ރާއްޖޭގައި މިވަގުތު އެއަރޕޯޓެއް ނެތް މަދު އަތޮޅުތަކުގެ ތެރޭގައި ހިމެނޭ އަތޮޅެކެވެ. މި އަތޮޅުގައި މީހުން ދިރިއުޅޭ 8 ރަށް އޮންނައިރު، އަތޮޅުގައި އެއަރޕޯޓެއް ތަރައްޤީވެގެންދިއުމަކީ މީގެ ގާތްގަނޑަކަށް 30 އަހަރު ކުރިއްސުރެ އަތޮޅުގެ ރައްޔިތުން ކުރަމުންދިޔަ އުންމީދެކެވެ. މިހާރު މިވަނީ މިކަމުގައި ހަޤީޤީ ކުލަ ޖެހެން ފަށާފައެވެ.
މިކަން ހަޤީޤަތަކަށް ހެދުމަށްޓަކާ މި ސަރުކާރުން ވަނީ މުލީގައި އެއަރޕޯޓެއް ތަރައްޤީކުރުމަށް ނިންމައި އެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، (އެމް.ޓީ.ސީ.ސީ)އާ ޙަވާލުކުރައްވާފައެވެ. މި މަޝްރޫޢުގެ އެއްބަސްވުމުގައި ޕްލޭނިންގ މިނިސްޓްރީން އެމް.ޓީ.ސީ.ސީއާއެކު ސޮއިކުރައްވާފައިވަނީ 28 ފެބްރުއަރީ 2021 ގައެވެ. މުލަކަތޮޅުގައި ތަރައްޤީކުރާ ފުރަތަމަ އެއަރޕޯޓުގެ މަސައްކަތް އެމްޓީސީސީން މިހާރު އަންނަނީ ކުރަމުންނެވެ. މުލީ އެއަރޕޯޓް މަޝްރޫޢަކީ އެރަށުގެ އިތުރުން މުޅި އެއަތޮޅުގެވެސް އިޤްތިޞާދީ އަދި އުމްރާނީ ތަރައްޤީއާއި ގުޅިފައިވާ އުންމީދީ މަޝްރޫޢެއްކަމަށް މ.އަތޮޅުގެ ރައްޔިތުން ފާހަގަކުރެއެވެ.
މުލީގައި އެއަރޕޯޓް ތަރައްޤީކުރުމަށް ހަމަޖެހިފައިވަނީ ރަށުގެ އިރުދެކުނު ފަރާތުން ހިއްކާފައިވާ 40 ހެކްޓަރުގެ ބިމުގައެވެ. މިއީ 2018 ވަނަ އަހަރު ހިއްކި ސަރަޙައްދެކެވެ. އެހެންނަމަވެސް އެއަރޕޯޓް ތަރައްޤީކުރުމަށް އިތުރަށް ބިން ބޭނުންވާތީ، އިތުރު 14 ހެކްޓަރު ހިއްކުމަށް ވަނީ ހަމަޖެހިފައެވެ.
މި މަޝްރޫޢުގެ ދަށުން މުލީ އެއަރޕޯޓުގައި 1200 ދިގު، 30 ފޫޓު ފުޅާ ރަންވޭއެއް ތަރައްޤީކުރުމާއި، ޓެކްސީވޭއާއި އޭޕްރެން ތަރައްޤީކުރުމަށް ވަނީ ހަމަޖެހިފައެވެ. އަދި އަލަށް ހިއްކާ ސަރަޙައްދުގެ ގޮނޑުދޮށް ޙިމާޔަތްކުރުމަށްޓަކާ 1812 މީޓަރުގެ ބޮޑުހިލައިގެ ރިވެޓްމަންޓް ޖެހުންވެސް ހިމެނެއެވެ. އެމް.ޓީ.ސީ.ސީން ވިދާޅުވެފައިވަނީ އެ ކުންފުނީގެ އަމާޒަކީ މުލީ އެއަރޕޯޓުގެ ޢަމަލީ މަސައްކަތް ފަށާތާ، އެއްއަހަރު ތެރޭ މަސައްކަތް އެއްކޮށް ނިންމާ ސަރުކާރާއި ހަވާލުކުރުން ކަމަށެވެ.
މި މަޝްރޫޢަށް 221 މިލިއަނަށްވުރެ ގިނަ ރުފިޔާ ހޭދަކުރެއެވެ.