މުލަކަތޮޅު ވޭވަށުގައި ސަރުކާރުން ތަރައްޤީކުރި ޒަމާނީ ތަނަވަސް ބަނދަރު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހުޅުއްވައިދެއްވައިފިއެވެ. މި ބަނދަރު ރައީސް ހުޅުއްވައިދެއްވީ މުލަކަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.
ވޭވަށު ބަނދަރު ހުޅުވުމަށް ބޭއްވި ރަސްމިއްޔާތުގައި ވޭވަށު ކައުންސިލްގެ ރައީސް މަމްދޫހު ވަހީދު ވިދާޅުވީ، މީގެ ކުރިން ވޭވަށު ރައްޔިތުން އުފުލަމުން އައި ވަރަށް ހިތްދަތި ތަކުލީފްތަކެއްކަމަށެވެ. ވޭވަށަކީ މަސްވެރި އަދި ފުޅާދާއިރާއެއްގައި މަސްކައްކާ ރަށެއްކަމުން ބަނދަރު ތިލަވުމުގެ ސަބަބުން ވަރަށް ބޮޑެތި ދަތިތަކާއި ކުރިމަތިލާން ޖެހުނުކަންވެސް ކައުންސިލްގެ ރައީސް ފާހަގަކުރެއްވިއެވެ. ވޭވަށުގައި ބަނދަރުގެ ދަތިކަމުން މީގެ ކުރިން މުދާ އުފުލުމަށް ބޭނުންކުރީ މުލަކު ބަނދަރުކަމަށާއި އެކަމުގެ ސަބަބުން ތަކެތީގެ އަގު އުފުލިގެންދާ ކަމަށް ކައުންސިލްގެ ރައީސް ވިދާޅުވިއެވެ.
ވޭވަށުގެ ތަރައްޤީއަށް އިތުރު މަޝްރޫޢުތައްވެސް ކުރިއަށްދާކަން ފާހަގަކުރައްވާ ކައުންސިލްގެ ރައީސް ވަނީ، މިއީ ވޭވަށަށް ދިރުން ގެނެސްދޭ މަޝްރޫޢުތަކެއް ކަމަށް ސިފަކޮށް ސަރުކާރަށް ޝުކުރު އަދާކުރައްވާފައެވެ.
ވޭވަށުގައި ޒަމާނީ ފެންވަރުގެ ބަނދަރެއް ހެދުމަށް ސަރުކާރުން އެމް.ޓީ.ސީ.ސީއާ ހަވާލުކޮށްފައިވަނީ 27 އޯގަސްޓް 2019 ގައެވެ. މި މަޝްރޫޢުގެ ދަށުން ބަނދަރު ހެދުމަށް އެރަށުގެ ފަޅުން 66831 ކިއުބިކް މީޓަރުގެ ސަރަޙައްދެއް ވަނީ ފުންކޮށްފައެވެ.
800 ފޫޓުގެ މި ބަނދަރުގައި 350 މީޓަރުގެ ބޭރުތޮށްޓެއްލައި، 130 މީޓަރު ރިވެޓްމަންޓް ޖަހާ، 380 މީޓަރުގެ އެއްގަމު ތޮށްޓެއް ވަނީ ލާފައެވެ. އަދި ބަނދަރާއި އިންވެގެން 1880 އަކަ މީޓަރުގެ ސަރަޙައްދެއްގައި ޕޭވްމަންޓް މަގު ހަދައި، ނެރުބައްތިއާއި މަގުބައްތި ހަރުކޮށްފައިވެއެވެ.
މ. ވޭވަށު ބަނދަރު ތަރައްޤީކުރުމުގެ މަޝްރޫޢަކީ ދަޢުލަތުގެ ބަޖެޓުން 51 މިލިއަން ރުފިޔާ ޚަރަދުކޮށްގެން ކުރިއަށްގެންދިޔަ މަޝްރޫޢެއެކެވެ.