ކުވައިތުގެ ޤައުމީ އެއަރލައިން ކުވައިތު އެއަރވޭސްގެ ދަތުރުތައް ރާއްޖެއަށް ފެށުމަށް ހަމަޖެހިއްޖެއެވެ. ކުވައިތު އެއަރވޭސްގެ ދަތުރުތައް ރާއްޖެއަށް ފެށުމަށް ހަމަޖެހިފައިވަނީ އަންނަ އޮކްޓޯބަރ މަހުއެވެ.
އޮކްޓޯބަރ 31 ވަނަ ދުވަހު ކުވައިތު އެއަރވޭސްގެ ދަތުރުތައް ރާއްޖެއަށް ފަށާއިރު ހަފްތާއަކު 2 ދަތުރު އެ އެއަރލައިނުން ރާއްޖެއަށް ކުރާނެއެވެ. މި ދަތުރުތަކުގައި އެ އެއަރލައިނުން ބޭނުންކުރާނީ އެއަރބަސް އޭ320 މަރުކާގެ ބޯޓެވެ.
މިދިޔަ އަހަރުގެ ތެރޭގައި ކުވައިތުގެ ކެބިނެޓުން ވަނީ ކޯވިޑްގެ ފިޔަވަޅުތައް އުވާލުމާއިއެކު ރާއްޖެއަށް ސީދާ ދަތުރުތައް ފަށާނެކަން ހާމަކޮށްފައެވެ.
މިއަހަރުގެ ފުރަތަމަ 6 މަސްދުވަހު ކުވައިތުން ރާއްޖެއަށް 4325 ފަތުރުވެރިން ވަނީ އައިސްފައެވެ. މިދިޔަ އަހަރުގެ މި މުއްދަތުގައި ކުވައިތުން ރާއްޖެ އައިސްފައިވަނީ 1274 ފަތުރުވެރިންނެވެ. މިއީ %239.5 އިތުރުވުމެކެވެ.