މޯލްޑިވްސް މާރކެޓިން އެންޑް ޕަބްލިކް ރިލޭޝަން ކޯޕަރޭޝަން ( އެމްއެމްޕީއާރްސީ) ގެ އޮޑިޓް ރިޕޯޓް ނެރުއްވުމުން ބައްލަވަންޖެހޭ ކަންކަން ބެއްލެވުމަށްފަހު ޤާނޫނީގޮތުން އަޅުއްވަންޖެހޭ ފިޔަވަޅުތައް އަޅުއްވަމުން ގެންދަވާނެކަމުގެ ޔަޤީންކަން ސަރުކާރުން ދެއްވައިފިއެވެ.ޕީއެސްއެމްއާ ވާހަކަފުޅުދައްކަވަމުން ރައީސުލްޖުމްހޫރިއްޔާގެ އޮފީހުގެ މިނިސްޓަރ ފޯރ ލީގަލް އެފެއަރޒް އަލްއުސްތާޛާ ޢާޒިމާ ޝަކޫރު ވިދާޅުވީ އެމްއެމްޕީއާރްސީގެ ޚާއްޞަ އޮޑިޓެއް ހެއްދެވުމަށްފަހު އެކުލަވާލެއްވި ރިޕޯޓް ނެރުއްވާ ދުވަހު، ރައީސުލްޖުމްހުރިއްޔާގެ އޮފީހަށްވެސް އެރިޕޯޓް ލިބިވަޑައިގަންނަވާނެ ކަމަށް ގަބޫލްފުޅުކުރައްވާކަމަށެވެ. އަދި އެ ރިޕޯރޓް ބެއްލެވުމަށްފަހު ޖިނާޢީ ގޮތުން އެއްވެސް ފަރާތަކާ މެދު ފިޔަވަޅެއް އަޅުއްވަންޖެހިވަޑައިގަންނަވާނަމަ، އެކަން އެންޓި ކޮރެޕްޝަން ކޮމިޝަނުން ކުރައްވާނެކަމަށް ދެކެވަޑައިގަންނަވާ ކަމަށާއި އެކަމުގައި ސަރުކާރުން ދެއްވަންޖެހޭ އެއްބާރުލެއްވުން ދެއްވަމުން ގެންދަވާނެ ކަމަށްވެސް ޢާޒިމާ ވިދާޅުވިއެވެ.އެމްއެމްޕީއާރްސީގެ ޚިޔާނާތުގެ ބޮޑެތި މައްސަލަތަކެއް ފެންމަތިވުމުން، އެ އިދާރާ އޮޑިޓްކުރެއްވުމަށް އޮޑިޓަރ ޖެނަރަލް ފެއްޓެވީ މިދިޔަ އަހަރުގެ އޮކްޓޯބަރ މަހުގެ ހަތާވީސްވަނަ ދުވަހު ރައީސުލްޖުމްހޫރިއްޔާ ޢަބްދުﷲ ޔާމީންގެ އެންގެވުމުގެ މަތިންނެވެ. 2013 ވަނަ އަހަރުގެ ނޮވެމްބަރ 17 ވަނަ ދުވަހުން ފެށިގެން މިދިޔަ އަހަރުގެ އޮކްޓޯބަރ މަހުގެ 27 ވަނަ ދުވަހާއި ހަމައަށް އެމްއެމްޕީއާރްސީގެ ތަފްޞީލް އޮޑިޓެއް ހައްދަވައިދެއްވުމަށް ރައީސުލްޖުމްހޫރިއްޔާ އެދިވަޑައިގެންފައިވެއެވެ. އެމްއެމްޕީއާރްސީ މެދުވެރިކޮށް ހިންގާފައިވާ ޚިޔާނާތަކީ މިހާތަނަށް ތަޙުޤީޤްކުރެއްވި ޚިޔާނާތުގެ ރެކޯރޑް މައްސަލައެއް ކަމަށް އޮޑިޓަރ ޖެނރަލްގެ އޮފީހުން ހާމަކުރައްވައެވެ. އަދި އެތަނުގެ އޮޑިޓް ރިޕޯޓް ވަރަށް އަވަހަށް އާއްމުކުރައްވާނެ ކަމަށްވެސް އޮޑިޓަރ ޖެނަރަލްގެ އޮފީހުން ވިދާޅުވެއެވެ. އެމްއެމްޕީއާރްސީގެ އޮޑިޓްކޮށް ރިޕޯޓް އެކުލަވާލާފައިވާއިރު އޭސީސީންވެސް ގެންދަވަނީ އެމްއެމްޕީއާރްސީން ހިންގާފައިވާކަމަށް ބުނާ ކޮރަޕްޝަންގެ މައްސަލަތައް ތަޙުޤީޤްކުރައްވަމުންނެވެ.އެމްއެމްޕީއާރްސީގެ ކޮރަޕްޝަނާ ގުޅުންހުރި ބައެއް މައްސަލަތަކުގައި ކުރީގެ ނާއިބް ރައީސް އަޙުމަދު އަދީބާއި އެކުންފުނީގެ ކުރީގެ މެނޭޖިންގ ޑިރެކްޓަރ ޢަބްދުﷲ ޒިޔަތާއި މި ބޭފުޅުންނާ ގާތްގުޅުމެއް އޮންނަ ޙާމިދު އިސްމާޢީލުގެ މައްޗަށް ދައުލަތުން ވަނީ ދަޢުވާ އުފުއްލަވާފައެވެ. އަދި ބައެއް މައްސަލަތަކުގެ ޝަރީޢަތްތައްވެސް ވަނީ ފަށްޓަވާފައެވެ.