އޮނަރަރީ ކޮންސުލް ސްކޮލަރޝިޕްގެ ދަށުން، ރާއްޖެއިން ބޭރުން ޑިގްރީ ފެންވަރަށް ކިޔެވުމުގެ 30 ފުރުޞަތު ހުޅުވާލައިފިއެވެ. މި ސްކޮލަރޝިޕްއަށް ހޮވޭ ދަރިވަރުންގެ ކޯސް ފީ މުޅިން ހިލޭ ވާނެއެވެ.
އޮނަރަރީ ކޮންސުލް ސްކޮލަރޝިޕްގެ ދަށުން ހުޅުވާލި 30 ފުރުޞަތުގެ ތެރޭގައި ހިމެނެނީ ވިޔަފާރިއާ ގުޅުންހުރި އެކި ދާއިރާތަކުގެ ކޯސްތަކެވެ.
ފުރުޞަތު ހުޅުވާލާފައިވާ ކޯސްތައް:
* ބެޗެލަރސް ޑިގްރީ އިން ބައޯޓެކްނޮލޮޖީ
* ބެޗެލަރސް ޑިގްރީ އިން ކޮމްޕިއުޓަރ އެޕްލިކޭޝަންސް
* ބެޗެލަރސް ޑިގްރީ އިން ބިޒްނަސް އެޑްމިނިސްޓްރޭޝަން
* ބެޗެލަރސް ޑިގްރީ އިން ޓުއަރިޒަމް
* ބެޗެލަރސް ޑިގްރީ އިން އިންގްލިޝް
* ބެޗެލަރސް ޑިގްރީ އިން ހޮޓެލް މެނޭޖްމަންޓް
މިިއިން ކޮންމެ ދާއިރާއަކުން 5 ސްކޮލަރޝިޕް ދިނުމަށްވަނީ ހަމަޖެހިފައެވެ. ކޯހުގެ ފުރުޞަތު ހުޅުވާލާފައިވަނީ އިންޑިއާގެ ބެންގަލޫރުގެ ގާޑެން ސިޓީ ޔުނިވަރސިޓީގައި ކިޔެވުމަށެވެ.
ކޯހަށް ކުރިމަތިލުމުގައި ޖީ.ސީ.އީ އޯލެވެލް، އައި.ޖީ.ސީ.އެސް.ސީ އަދި އެސް.ސީ.ސީ އިމްތިހާނުން ކަނޑައެޅިފައިވާ ވަކި އަދަދަކަށް ފާސް އޮންނަން ވާނެއެވެ. ކޯހުގެ ޝަރުތުތަކުގެ ތަފްސީލް މިނިސްޓްރީ އޮފް ހަޔަރ އެޑިއުކޭޝަނުން ވަނީ ގެޒެޓްކޮށްފައެވެ.
މިފުރުޞަތުގައި ސްކޮލަރޝިޕް ލިބޭނީ ކޯސް ފީއަށެވެ. ކޯހަށް ހޮވޭ ކެންޑިޑޭޓުންގެ ދެކޮޅު ޓިކެޓް، ބުކް އެލަވަންސް، ޔުނިވަރސިޓީ ރެޖިސްޓްރޭޝަން ފީ، އިންޝުއަރެންސް، ވިސާ އަދި ކޯހާ ގުޅޭ އިތުރު ޚަރަދުތައް ބަލަހައްޓަންޖެހޭނީ އެ ދަރިވަރަކު އަމިއްލައަށެވެ.
ފޯމު ހުށައެޅުމަށް ހުޅުވާލާފައިވަނީ މިމަހުގެ 25ވަނަ ދުވަހުގެ 12:30ގެ ނިޔަލަށެވެ. ފޯމު ހުށައަޅާނީ http://myedu.egov.mv އަށެވެ. ކޮންމެ މީހަކަށްވެސް ފޯމް ހުށައެޅޭނީ އެއް ކޯހަށެވެ. ޝަރުތުތަކާއި، ފޯމާއި އެކު ހުށައަޅަންޖެހޭ ލިޔެކިޔުމުގެ ތަފްސީލްތައް ގެޒެޓްގައި ވަނީ ހިމަނާފައެވެ.
ކޯސް ފުރިހަމަކުރުމަށްފަހުގައި ވަކި މުއްދަތަކަށް ދިވެހިރާއްޖެއަށް ޚިދުމަތް ކުރުމަށް ބޮންޑު ކުރެވޭނެއެވެ.