ކ.ކާށިދޫ ސްކޫލްގައި އަލަށް ހަދަމުން އަންނަ ޢިމާރާތުގެ މަސައްކަތް ނުނިމެނީސް ކިޔަވައިދޭން ފެށުމާއި ގުޅިގެން އައު ޢިމާރާތުގައި ކިޔަވައިދިނުން ހުއްޓުވާ އެމައްސަލަ އެޑިއުކޭޝަން މިނިސްޓްރީން ބަލަން ފަށައިފިއެވެ.
ޕީ.އެސް.އެމް ނިއުސްއަށް މަޢުލޫމާތު ދެއްވަމުން މިނިސްޓްރީ އޮފް އެޑިއުކޭޝަންގެ ޕަރމަނަންޓް ސެކެޓްރީ އަޙްމަދު އަލީ ވިދާޅުވީ، އައު ޢިމާރާތެއްގައި ކިޔަވައިދޭން ފެށުމުގެ ކުރިން އެޑިއުކެޝަނުން އެކަމަށްޓަކާ ކަނޑައަޅާފައިވާ އުސޫލުގެ ދަށުން ޢިމާރާތުގެ އިންސްޕެކްޝަނެއް ހަދާކަމަށެވެ. އަދި އެއީ ދަރިވަރުން ކިޔަވަން ތިބެން އެންމެ ރައްކާތެރި ތަނެއްކަން ކަށަވަރުކުރުމަށްފަހު ސްކޫލާއި ޢިމާރާތް ޙަވާލުކުރުމުގެ ކުރިން އެއްވެސް ސްކޫލެއްގައި ކިޔަވައިދިނުމަކީ މަނާކަމެއްކަމަށެވެ.
އެޑިއުކޭޝަން މިނިސްޓްރީގެ އުސޫލްތަކާ ޚިލާފަށް ކާށިދޫ ސްކޫލްގައި މިއަހަރުގެ ދިރާސީ އައު އަހަރުގެ ކިޔެވުން ފެށުމާއި ގުޅިގެން އެދުވަހުން އެދުވަހަށް އެތަނުގައި ކިޔެވުން ހުއްޓުވާ އެކަން މިހާރު ބަލަމުންދާކަމަށް އެޑިއުކޭޝަނުން ވިދާޅުވެއެވެ. އެޑިއުކޭޝަން މިނިސްޓްރީން ވިދާޅުވީ، އެމިނިސްޓްރީން އެންމެ ފުރަތަމަ އިސްކަންދޭނީ ދަރިވަރުންގެ ރައްކާތެރިކަމަށް ކަމަށެވެ.
ޕީ.އެސް.އައި.ޕީގެ ދަށުން 16 ކްލާސްރޫމާއެކު 4 ފަންގިފިލައަށް ކާށިދޫ ސްކޫލްގެ އައު ޢިމާރާތް އެޅުމަށް ޙަވާލުކޮށްފައިވަނީ ޑަބްލިއު އެންޑް އޭ އޯވާސީސް ޕްރައިވެޓް ލިމިޓެޑާއެވެ. ދެދަންފަޅިއަށް މިހާރު ކިޔަވައިދޭ ކާށިދޫ ސްކޫލްގެ އައު އިމާރާތް ނިމުމުން އެސްކޫލްގައި އެއްދަންފަޅިއަށް ކިޔަވައިދޭން އެޑިއުކޭޝަނުން ވަނީ ނިންމާފައެވެ.