އެއްގަމު އުޅަނދު ދުއްވުމުގެ ލައިސަންސްގެ ތިއަރީ އިމްތިޙާނާއި ތަމްރީން ހިންގުން މޯލްޑިވްސް ޕޮލިޓެކްނިކްގެ އެހީގައި ކުރިއަށްގެންދިޔުމުގެ އެއްބަސްވުމެއްގައި ސޮއިކޮށްފިއެވެ.
މި އެއްބަސްވުން އެކުލަވާލާފައިވަނީ މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނާއި، މިނިސްޓްރީ އޮފް ހަޔަރ އެޑިޔުކޭޝަނާއި ދެމެދުއެވެ. މޯލްޑިވްސް ޕޮލިޓެކްނިކްގެ އޮޑިޓޯރިއަމްގައި މިއަދު ބޭއްވި ރަސްމިއްޔާތެއްގައި ޓްރާންސްޕޯޓް މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރ ޢާއިޝަތު ނަހުލާއެވެ. އަދި ހަޔަރ އެޑިއުކޭޝަން މިނިސްޓްރީގެ ފަރާތުން ސޮއިކުރެއްވީ މިނިސްޓަރ ޑރ. އިބްރާހީމް ޙަސަނެވެ.
މި ރަސްމިއްޔާތުގައި ވާހަކަފުޅުދައްކަވަމުން ޓްރާންސްޕޯޓް މިނިސްޓަރ ޢާއިޝަތު ނަހުލާ ވިދާޅުވީ، ހަޔަރ އެޑިއުކޭޝަން މިނިސްޓްރީއާއެކު މިވެވުނު އެއްބަސްވުމުގެ ސަބަބުން އެއްގަމު އުޅަނދު ދުއްވުމުގައި ރައްކާތެރިކަން ކަށަވަރުކުރުމަށް އިތުރު ބާރަކަށް ވެގެންދާނެކަމަށެވެ. މިނިސްޓަރ ވިދާޅުވީ، ރޯޑްވާދިނަސް ހައްދައިދިނުމުގައި ބައެއް ގަރާޖްތަކުން ކަނޑައަޅާފައިވާ އުސޫލުތަކާއި މިންގަނޑުތަކަށް އެންމެ އެދެވޭގޮތުގައި ނުބަލާކަން ފާހަގަކުރެވޭކަމަށެވެ.
އެހެންކަމުން މިވެވުނު އެއްބަސްވުމުގެ ދަށުން މާލޭ ސަރަޙައްދުގައި ރޯޑް ވާދިނަސް ހަދާ ގަރާޖުތަކުގައި މަސައްކަތްކުރާ ދިވެހިންނަކީ މިކަމުގެ ތަމްރީން ލިބިފައިވާ ބަޔަކަށް ހެދުމަކީ އަމާޒެއްކަމަށް މިނިސްޓަރ ނަހުލާ ވިދާޅުވިއެވެ. މިހާރުވެސް މާލޭ ސަރަޙައްދުގައި ލައިސަންސްގެ ތިއަރީ އިމްތިޙާނު ހިންގައިދެނީ ޕޮލިޓެކްނީކުންކަން ފާހަގަކުރައްވާ، މިއީ ޓްރާންސްޕޯޓް މިނިސްޓްރީގެ މަސައްކަތްތަކަށް ލިބުނު ބޮޑު އެހީތެރިކަމެއްކަމަށް މިނިސްޓަރ ވިދާޅުވިއެވެ. އަދި އެއް ވުޒާރާއިން ކުރާ ކަމެއްގައި އަނެއް ވުޒާރާއިން އެހީތެރިވުމަކީ ސަރުކާރު އިތުރަށް ވަރުގަދަވެގެންދާނެކަމެއްކަމަށްވެސް މިނިސްޓަރ ނަހުލާ ވިދާޅުވިއެވެ.
"އަޅުގަނޑު ޤަބޫލުކުރަނީ ރޯޑްވާދިނަސް ހެދޭ ކޮންމެ ގަރާޖެއްގައި ދިވެއްސަކު ހުރުން މުހިއްމުކަމަށް. އެހެންވީމަ އަޅުގަނޑު ޤަބޫލުކުރާގޮތުގައި ވަޒީފާގެ ފުރުޞަތުތައްވެސް އިތުރަށް ތަނަވަސްވެގެންދާނެ. އަދި ޕޮލިހުންނަށް މިކަންތައްތައް މޮނިޓަރކުރަންވެސް ފަސޭހަވެގެންދާނެ" މިނިސްޓަރ ނަހުލާ ވިދާޅުވިއެވެ.
މި ރަސްމިއްޔާތުގައި ވާހަކަފުޅުދައްކަވަމުން ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ޙަސަން ވިދާޅުވީ، މި އެއްބަސްވުމުގެ ދަށުން ގަރާޖުތަކަށް ޓްރާންސްޕޯޓް މިނިސްޓްރީން ބޭނުންވާ ފެންވަރުގެ މީހުން ތަމްރީންކުރުމުގެ މަސައްކަތް ޕްލިޓެކްނިކުން ކުރާނެކަމަށެވެ. އަދި މިއީ ޕޮލިޓެކްނިކްގެ ޓްރަސްޓް ފަންޑަށްވެސް ފައިދާތަކެއް ލިބިގެންދާނެކަމެއްކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ، ކޮންމެ ދާއިރާއަކުން މީހުން ތަމްރީންކުރުމުގައިވެސް އެންމެ ބޮޑު އިސްކަމެއްދެނީ ތަމްރީންތަކުގެ ފެންވަރު ހިފެހެއްޓުމަށްކަމަށެވެ.
"އަޅުގަނޑުމެންގެ އުއްމީދަކީ ސްކިލްސް ޑިވެލޮޕްމަންޓް ދާއިރާއިން ތަފާތު އެކިއެކި އޭރިއާތަކުން މީހުން ބިނާކުރަމުންދާއިރު އެ ދާއިރާތަކުން އެމީހުން އެ ބިނާކުރެވެނީ ސަރުކާރު ޤަބޫލުކުރާ ފެންވަރަކަށްކަން ކަށަވަރުކުރުން. މޯލްޑިވްސް ނެޝެނަލް ސްކިލްސް ޑިވެލޮޕްމަންޓް އޮތޯރިޓީން ތައްޔާރުކޮށްފައި ހުރި ކޮމްޕިޓެންސީ ސްޓޭންޑެޑްތަކާ އެއްވަރަށް މީހުން ތައްޔާރުކުރެވި އިމްތިހާނުކުރެވިގެން ގެންދެވޭނަމަ މަސައްކަތުގައި ނިކުންނަށް ހުނަރުވެރި ފަންނުވެރި މަސައްކަތްތެރިންނަކީ އެމީހުން ކުރާ މަސައްކަތަށް އިތުބާރުކުރާ މަސައްކަތްތަކަކަށް ވެގެންދާނެ" މިނިސްޓަރ ޑރ. އިބްރާހީމް ޙަސަން ވިދާޅުވިއެވެ.
ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ޙަސަން ވިދާޅުވީ، ޓްރާންސްޕޯޓް ދާއިރާއަކީ ތަފާތު ގިނަ ހުނަރުތައް އެކުލެވޭ މަސައްކަތްތައް ހިމެނޭ ދާއިރާއެއްކަމަށެވެ. އަދި މި ދާއިރާގައި މަސައްކަތްކުރާ މީހުންނަކީ ނެޝެނަލް ސްކިލްސް ޑިވެލޮޕްމަންޓް އޮތޯރިޓީން ތައްޔާރުކޮށްފައިވާ ކޮމްޕިޓެންސީ ސްޓޭންޑެޑްތަކާ އެއްގޮތަށް ކޯސްތައް ފުރިހަމަކޮށްގެން މަސައްކަތުގެ މާހައުލުގައި އުޅޭ ބަޔަކަށް ހެދުމަކީ އަމާޒެއްކަމަށެވެ.