ސޯޝަލް މީޑިއާގައި މިހާރު ދައުރުވަމުންދާ ފައިސާގެ ޗެކުތަކެއްކަމަށް ބުނާ ލިއުންތައް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އިސްތަށިފުޅުގައި އެޅުއްވުމަށް ބައެއްފަރާތްތަކުން މަސައްކަތްކުރައްވަމުން ގެންދަވާތީ އެމައްސަލަ ތަޙްގީޤްކުރެއްވުމަށް ކަމާ ގުޅުންހުރި އިދާރާތަކަށް ރައީސުލްޖުމްހޫރިއްޔާގެ އޮފީހުން ހުށައަޅުއްވައިފިއެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާން އިބްރާހީމް މުޢާޒް ޢަލީ ވިދާޅުވީ މިހާރު ސޯޝަލް މީޑިޔާއާއި، ރާއްޖޭގެ ބައެއް މީޑިޔާތަކުގައި ރައީސުލްޖުމްހޫރިއްޔާއަށް ނިސްބަތްވާ ގޮތަށް، މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯޕޮރޭޝަން (އެމް.އެމް.ޕީ.އާރް.ސީ) ގެ ޗެކަކާ ގުޅޭގޮތުން ފަތުރަމުންދާ މަޢުލޫމާތަކީ ދޮގު މަޢުލޫމާތެކެއްކަމަށެވެ.
އެއްވެސް ފަރާތަކުން ރައީސުލްޖުމްހޫރިއްޔާއަށް ނިސްބަތްކޮށް ދޮގު މަޢުލޫމާތު ފެތުރުމަކީ ސަރުކާރުން ނިހާޔަތަށް ހިތާމަ ކުރާކަމެއްކަމަށާއި، ސަރުކާރުގެ އެދުމަކީ ސަރުކާރުގެ ނުވަތަ ދައުލަތުގެ ޚިޔާނާތުގެ މައްސަލަތައް، ކަމާބެހޭ މުއައްސަސާތަކަށް ހުށަހަޅައިގެން ކުރިއަށް ގެންދިއުންކަމަށް ވިދާޅުވިއެވެ.
ރާއްޖޭގައި ބްރޯޑްކާސްޓްކުރުމުގެ ޤާނޫނުގެ ދަށުން ހުއްދަ ލިބިވަޑައިގެން ތިއްބެވި ބައެއް މީޑިއާގެ ފަރާތްތަކުންވެސް މިކަން ރައީސުލްޖުމްހޫރިއްޔާގެ އިސްތަށިފުޅުގައި އެޅުއްވުމަށް މަސައްކަތްތަކެއް ކުރައްވަމުން ގެންދަވާކަމަށް ވިދާޅުވިއެވެ.
މުޢާޒް ވިދާޅުވީ، މީޑިއާގެ ބެލެނިވެރި ފަރާތްތަކަށް މި މައްސަލާގައި ފިޔަވަޅު ނޭޅޭނަމަ ދިވެހި ސަރުކާރުގެ ފަރާތުން މިކަން ކަމާގުޅުންހުރި މުއައްސަސާތަކަށާއި، ޝަރޫޢީ މަރުހަލާގެ ފަރާތްތަކަށް ހުށައަޅުއްވާނެކަމަށެވެ. އަދި ވަރަށް ސީރިއަސް މައްސަލައެއްގެ ގޮތުގައި ބައްލަވާކަމަށާއި، މިހާރު ފުލުހުންނަށް ހުށައަޅުއްވާފައިވާކަމަށް މުޢާޒް ވިދާޅުވިއެވެ.