ރިސޯޓް ސަޕްލައި އިންޑަސްޓްރީއަށް އަމާޒުކޮށްގެން ބާއްވާ "އެސްޓްރަބޮން އެކްސްޕޯ" ފަށައިފިއެވެ. މި އެކްސްޕޯ ފަށްޓަވައިދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހެވެ.
އެސްޓްރަބޮން އެކްސްޕޯ ކުރިއަށްދާނީ މިމަހުގެ 7އިން 9އަށް މެންހަޓަން ބިޒްނަސް ހޮޓެލްގެ ފުރަތަމަ ފަންގިފިލާގައެވެ. މި އެކްސްޕޯއަކީ އެސްޓްރަބޮން ކުންފުނިން އެފް އެންޑް ބީ ދާއިރާއާއި ރިސޯޓް ސަޕްލައި ދާއިރާއަށް ޚާއްސަކޮށްގެން ކުރިއަށްގެންދާ އެކްސްޕޯއެކެވެ.
މި އެކްސްޕޯއާ ގުޅޭގޮތުން ވާހަކަފުޅުދައްކަވަމުން އެސްޓްރަބޮންގެ ސީއީއޯ ޔޫސުފް ރިއްފަތު ވިދާޅުވީ، މި އެކްސްޕޯ ބާއްވަން މަސައްކަތްކުރީ މީގެ 2 އަހަރު ކުރިންކަމަށެވެ. ނަމަވެސް އެކްސްޕޯ ބޭއްވުން ލަސްވެގެންދިޔައީ ކޯވިޑް-19ގެ ސަބަބުންކަމަށް އޭނާ ވިދާޅުވިއެވެ. މި އެކްސްޕޯގައި ދައްކާލަނީ އެސްޓްރަބޮންއިން ރާއްޖެއަށް ސަޕްލައިކުރާ އެކިއެކު ކުންފުނިތަކުގެ އުފެއްދުންތަކެވެ. އޭގެތެރޭގައި ޖަރުމަނުވިލާތް، ސްޕެއިން އަދި އިޓަލީވިލާތުގެ ކުންފުނިތައް ހިމެނެއެވެ.
"މި އެކްސްޕޯ ބާއްވަން ހިޔާލުކުރިން މީގެ 2 އަހަރު ކުރިންވެސް. އެހެންނަމަވެސް ކޯވިޑާއިހެދި ޔޫރަޕްގެ ބައެއް ސަޕްލަޔަރުންނަށް ނާދެވުމާއިއެކު ލަސްކޮށްފައި މިއަހަރު އަޅުގަނޑުމެން މި ހުޅުވީ. އެސްޓްރަބޯންގެ އެންމެ ބޮޑު މަޤްސަދަކީ ރާއްޖެއަކީ އެންމެ ގިނަ ލަގްޒަރީ ރިސޯޓްތަކާއި ބައިވަރު ބްރޭންޑްސްތައް ހުންނަ ޤައުމަކަށްވާއިރު އެ ރިސޯޓްތަކުން މި ބޭނުންކުރަނީ ވަރަށް ހައި ކޮލެޓީ ޕްރޮޑަކްޓްސް. އެ މީހުންނަށް ސަރވިސް ދިނުމަށްޓަކައި އިންޓަނޭޝަނަލް ބްރޭންޑްސް އަޅުގަނޑުމެންނާއިއެއްކޮށް އެކްސްކުލޫވިސް މާހައުލެއްގައި ބޭރުގެ ސަޕްލަޔަރުން މަސައްކަތް ކުރަނީ." ރިއްފަތު ވިދާޅުވިއެވެ.
އެސްޓްރަބޮންއާ ގުޅުން ހުރި 8 ސަޕްލަޔަރެއްގެ ޕްރޮޑަކްޓް މި އެކްސްޕޯގެ ތެރެއިން ވަނީ ދައްކާލާފައެވެ. އެސްޓްރަބޮންއިން ބުނީ މި އެކްސްޕޯއަކީ މިހާރު ފުޅާވަމުން އަންނަ ރިސޯޓް ސަޕްލައިއާއި އެފް އެންޑްބީ ދައިރާގެ ސާމާނުތަކަށް ޚާއްސަ އެކްސްޕޯއެއް ކަމަށެވެ. އަދި މިއީ މިބާވަތުގެ އެންމެބޮޑު އެކްސްޕޯއަށް ހެދުމަށް މަސައްކަތް ކުރަމުންދާކަމަށް އެސްޓްރަބޮން ކުންފުނިން ބުނެއެވެ.
މިއެކްސްޕޯގައި ބަދިގެ ސާމާނާއި، އެފްއެންބީ އެކްސެސަރީސްގެ އިތުރުން، ލޯންޑްރީއާއި ހިފާ ގެންގުޅޭ ބައެއް ސާމާނު ވަނީ ޝޯކޭސްކޮށްފައެވެ. އެކްސްޕޯ ކުރިއަށް ދާނީ އަންގާރަ އަދި ބުދަ ދުވަހު ހެނދުނު 10:00އިން 5:00އަށެވެ. އަދި އެކްސްޕޯގެ ފަހު ދުވަސް ކަމަށްވާ ޖޫން 9 ވާ ބުރާސްފަތި ދުވަހު ކުރިއަށް ދާނީ 10:00އިން ހަވީރު 3:00އަށެވެ.
އެސްޓްރަބޮންއިން ބުނިގޮތުގައި، އެކުންފުނީގެ އަމާޒަކީ ރިސޯޓް ސަޕްލައި އިންޑަސްޓްރީ އެއްކޮށް ބަދަލުކޮށްލުން ކަމަށާއި، މިކަމަށް މިފަދަ އެކްސްޕޯއެއްގެ ސަބަބުން މަގުފަހިކޮށްދޭކަމަށެވެ. އަދި ވިޔަފާރިތަކާއި އާންމު ފަރާތްތައްވެސް އެކްސްޕޯގެ ތެރެއިން ގުޅުވާލެވޭނެކަމަށް އެކުންފުނިން ބުނެއެވެ.