ޤާނޫނަށް އިޞްލާހު ނުގެނެސްވެސް، ލޯކަލް ކައުންސިލްތަކަށް ދިމާވެފައިވާ ލޭންޑު ޔޫސް ޕްލޭން ހެދުމުގެ ދަތިކަން ހައްލު ކުރެވިދާނެކަމަށް ޤަބޫލުފުޅު ކުރައްވާކަމަށް ލޯކަލް ގަވަރުމަންޓް އޮތޯރިޓީ (އެލްޖީއޭ)ގެ ސީއީއޯ ފާޠިމަތު އަފްޝަން ލަޠީފް ވިދާޅުވެއްޖެއެވެ.
"ވިއަވަތި ރާއްޖެ" ކޮންފަރެންސްއަށް ފަހު ޕީއެސްއެމް ނިއުސްއަށް ދެއްވި އިންޓަރވިއުގައި އެލްޖީއޭގެ ސީއީއޯ އަފްޝަން ވިދާޅުވީ، މިހާތަނަށް އެއޮތޯރިޓީގައި އޮތް އެންމެ ބޮޑު ކަންބޮޑުވުމަކީ ރަށްރަށުގެ ލޭންޑު ޔޫސް ޕްލޭން ހެދުމަށް އޮތް ގޮންޖެހުންތައް ކަމަށެވެ. އެކަން ހައްލުކުރެވޭނެ ބައެއް ގޮތްތައް ރައްޔިތުންގެ މަޖިލީހަށާއި ޕްލޭނިން މިނިސްޓްރީއާ މީގެކުރިން ހިއްސާކުރައްވާފައި ވާނެކަމަށާ، ނަމަވެސް ޕްލޭނިން މިނިްޓަރ މުޙައްމަދު އަސްލަމް ހޯއްދަވައިދެއްވި ހައްލާއެކު ކައުންސިލްތަކުގެ ކަންބޮޑުވުމަށް ލުޔެއް ލިބިގެންދާނެކަމަށް އަފްޝަން ވިދާޅުވިއެވެ.
"އަޅުގަނޑުމެންނަށް އޮތް ވަރަށް ބޮޑު ހިތް ހަމަޖެހުމެއް އެެެއީ ހައްލުތައް މިނިސްޓްރީން އައީމަ. ދެން އަޅުގަނޑަށް ޤަބޫލުކުރެވެނީ ކައުންސިލްތަކުން އެ ވިދާޅުވި ހުރިހާކަމެއް ވަރަށް ބަރާބަރަށް ވަރަށް ފުރިހަމައަށް ކުރައްވާނެކަމަށް. އެބޭފުޅުން ކެތްމަދުވެފައި ތިބީ ލޭންޑު ޔޫސް ޕްލޭން ފާސްކުރުމަށް." އަފްޝަން ވިދާޅުވިއެވެ.
އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގައި ބަޔާންކޮށްފައިވާތުގައި ރަށްރަށުގެ ތަރައްޤީއަށް ހިންގާ މަޝްރޫޢުތައް ހިންގޭނީ ލޭންޑުޔޫސް ޕްލޭން ހަދައި ޕްލޭނިންގ މިނިސްޓްރީން ފާސްކޮށްގެންނެވެ. އަދި އެ ޤާނޫނުގައި ބަޔާންކުރަނީ ކައުންސިލްތަކުގެ އިންތިޚާބަށްފަހު، އިންތިޚާބުކުރެވޭ މެންބަރުން މަޤާމާ ޙަވާލުވުމަށްފަހު ތިން މަސްދުވަހުގެ ތެރޭގައި، އަތޮޅު ކައުންސިލުން ފޯރުކޮށްދޭ ފަންނީ އެހީތެރިކަމާއެކު، އެ ރަށެއްގެ ރަށުގެ ތަރައްޤީގެ ޕްލޭނާއި ލޭންޑް ޔޫސް ޕްލޭން ކޮންމެ ރަށެއްގެ ރަށު ކައުންސިލުން އެކުލަވާލަންވާނެކަމަށެވެ. ނަމަވެސް ކައުންސިލްތައް ހުވާކުރިތާ އަހަރެއް ފާއިތުވީއިރު މިހާތަަނަށް ފާސްކުރެވިފައިވަނީ އެންމެ 7 ރަށުގެ ލޭންޑު ޔޫސް ޕްލޭނެވެ.
ލޭންޑުޔޫސް ޕްލޭން އެކުލަވާލައި ފާސްކުރުމަށް ޕްލޭނިން މިނިސްޓްރީއަށް ފޮނުވި ނަމަވެސް އެ ޕްލޭންތައް ފާސްކުރެވިފައިނުވާތީ ކައުންސިލްތަކުން ދަނީ ކަންބޮޑުވުން ފާޅުކުރަމުންނެވެ. ވިއަވަތި ރާއްޖެ ކޮންފަރެންސްގައި ޕްލޭނިން މިނިސްޓަރ މުޙައްމަދު އަސްލަމް ވަނީ އެކަމަށް ފަސޭހަ ހައްލެއް ހޯއްދަވަައިދެއްވާފައެވެ.
އެގޮތުން ލޭންޑުޔޫސް ޕްލޭން ހަދާނެގޮތުގެ ޕްރެޒެންޓޭޝަނެއް ހުށަހަޅުއްވަމުން މިނިސްޓަރ އަސްލަމް ވިދާޅުވީ ރަށްރަށުގައި ކުރިން ހަދާފައިވާ ޗާޓު އަޕްގްރޭޑްކޮށްގެންވެސް ލޭންޑުޔޫސް ޕްލޭން ހެދިދާނެކަމަށެވެ. އެގޮތުން ކުރީގެ ޗާޓުތަކާއި، ފެނާއި ނަރުދަމާ ފަދަ މަޝްރޫޢުތައް ހިންގުމަށް ހަދާފައިވާ ޗަޓުތަކުގައި ރަށްރަށުގެ ތަރައްޤީއަށާއި ގޯތި ދޫކުރުމަށާއި ފަޅުން ހިއްކޭނެކަމަށް ލަފާކުރެވޭ ސަރަހައްދުތައް ފާހަގަކުރުމުން ލޭންޑުޔޫސް ޕްލޭނަށް އެ ޗާޓު ބޭނުންކުރެވިދާނެކަމަށެވެ.
ލޭންޑްޔޫސް ޕްލޭންގައި ރަށުގައި ހިމެނޭ ރުއްގަސް ހިމެނުމަށްވެސް ބަޔާންކޮށްފައިވާތީ އެކަން މާނަކުރުމުގައިވެސް ދަތިތަކެއް އެބަހުރިކަމަށް މިނިސްޓަރ އަސްލަމް ވިދާޅުވެފައިވެއެވެ. އެގޮތުން ކޮންމެ ގަހެއް ގުނުމަކީ ދަތިކަމަށްވާނެކަމަށާ، ރަށުގެ މަތިން ނަގާފައިވާ ފޮޓޯއަކުން އެވްރެޖުކޮށް ގުނެވޭނެ ރުށްގަސް ގުނުމަށްފަހު ލޭންޑް ޔޫސް ޕްލޭންގައި ހިމެނުމުން ޤަބޫލުކުރެވޭނެކަމަށް މިނިސްޓަރ ވިދާޅުވިއެވެ.
"ކުރީގެ ޗާޓުތަކުގައި މިސްކިތް ހުރިތާ މިސްކިތް ހުންނާނީ، އެތަންތަން ބަދަލުނުވާނެ. ގަބުރަސްތާނުވެސް ހުންނާނީ ހުންނަތާ، އަލަށް އާބާދުވީ ސަރަހައްދު އޮންނާނެ. އެކަން އަޕްޑޭޓްކޮށްލަންޖެހޭނީ،. ޒަމާނީ ޓެކްނޮލޮޖީގައި މިހަކަން ކުރެވިދާނެ." މިނިސްޓަރ އަސްލަމް ވިދާޅުވިއެވެ.
ލޭންޑުޔޫސް ޕްލޭން ހެދުމަށް އޮތް ދަތިތަކަށް މިނިސްޓަރ އަސްލަމް ހޯއްދަވައިދެއްވި ހައްލާ ގުޅޭގޮތުން ރައީސް އިބްރާހީމް މުޙައްމަދު ޞާލިޙް ވިދާޅުވީ، މިނިސްޓަރ އަސްލަމް ފާހަގަކުރެއްވި ގޮތަށް ލޭންޑުޔޫސް ޕްލޭން ހެދުމުން ވީހާވެސް އަވަހަށް ފާސްކޮށްދެއްވާނެކަމަށެވެ. މިއާއެކު ރަށްރަށުގެ ތަރައްޤީއަށް ހުރި ގޮންޖެހުންތަކަށް ހައްލު ހޯއްދަވައިދެއްވާނެކަމަށްވެސް ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
ލޭންޑުޔޫސް ޕްލޭން އެކުލަވާލައި ފާސްކުރުމަށް ޕްލޭނިން މިނިސްޓްރީއަށް މިހާތަނަށް ހުށައެޅީ 55 ރަށަކުންނެވެ. އަދި މިހާތަަނށް ފާސްކުރެވިފައިވަނީ 7 ރަށެއްގެ ލޭންޑުޔޫސް ޕްލޭނެވެ. އަދި 11 ރަށެއްގެ ލޭންޑު ޔޫސް ޕްލޭން ފާސްކުރުމުގެ އެންމެ ފަހު މަރުހަލާގައިވާކަމަށާ، ޕްލޭން ގޯސްވެގެން 26 ރަށެއްގެ ޕްލޭން އަނބުރާ ފޮނުވާލާފައިވާކަމަށްވެސް ޕްލޭނިން މިނިސްޓްރީން ވިދާޅުވިއެވެ.