ފުލުހުން ވިދާޅުވާގޮތުގައި މާލޭގައި އެކަނިވެސް 44 ގޭންގު ހަރަކަތްތެރިވެއެވެ. އޭގެތެރެއިން 9 ގޭންގަކުން ނުރައްކާތެރި ކުށްތަކަށް އަރައިގަންނަމުންދެއެވެ. މިހާރު އޮތް އެންމެ ބޮޑު ބިރަކީ އެ ގޭންގުތައް އަތޮޅުތަކަށް ފުޅާކުރަމުން އައުމެވެ.
ވިއަވަތި ރާއްޖެ، ކޮންފަރެންސްގައި ފުލުހުން ހާމަކުރެއްވި މަޢުލޫމާތުތަކުން އެނގޭގޮތުގައި ގޭންގު ކުށްތަކާއި މަސްތުވާތަކެތީގެ ވިޔަފާރި އަންނަނީ އަތޮޅުތަކަށް ފުޅާވަމުންނެވެ.
ފުލުހުން ހުށަހެޅި ޕްރެޒެންޓޭޝަނުން ހާމަވާގޮތުގައި މާލޭގައި އެކަނިވެސް 44 ގޭންގު އުފެދިފައިވެއެވެ. އެއީ 1990އިގެ ކުރީކޮޅުން ފެށިގެން ލިސްޓުކުރެވިފައިވާ ގޭންގުތަކެއްކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ، ކޮންމެ ދުވަހަކުވެސް މަގުތަކަށް ނުކުމެ މާރާމާރީ ހިންގާ، މަސްތުވާތަކެތީގެ ވިޔަފާރި ކުރުމުގައި ޢަމަލީގޮތުން ހަރަކަތްތެރި 9 ގޭންގު ފާހަގަކުރެވިފައިވާކަމަށެވެ. މިފަދަ 44 ގޭންގުގައި 2800އަށްވުރެ ގިނަ މީހުން ލިސްޓްކޔރެވިފައިވާކަމަށް ފުލުހުން ވިދާޅުވެއެވެ. އޭގެތެރެއިން ނުރައްކާތެރި ކުށްތަކަށް އަރައިގަންނަ 1300އެއްހައި މީހުން އުޅެއެވެ. އަދި އެ ގޭންގުތަކުގައި 60 ކުޑަކުދިންވެސް ހިމެނޭކަމަށް ފުލުހުން ވިދާޅުވިއެވެ.
އެ ގޭންގުތަކާމެދު އެކަށީގެންވާ ފިޔަވަޅުތަކެއް ނޭޅޭނަމަ އަތޮޅުތަކަށް ފެތުރިގެން ދިއުމުގެ ބިރު އެބައޮތްކަމަށް ފުލުހުން ވިދާޅުވެއެވެ. އެ ގޭންގުތައް މިހާރު މާލެ އަތޮޅުގެ އިތުރުން މެދުރާއްޖެތެރެއާއި، ދެކުނުގެ އަތޮޅުތަކަށް ފުޅާކޮށްފައިވާކަމަށާ، އަތޮޅުތަކުގައި އެ ގޭންގުތައް އިތުރަށް ފުޅާކޮށް ބޮޑެތި ގޭންގުތަކަށްވެ ބޮޑެތި ކުށްތައް ކޮށްފާނެކަމުގެ ކަންބޮޑުވުންވެސް ފުލުހުން ފާޅުކުރިއެވެ.
ކުރިން އަތުންނާއި ފައިން، ލަކުޑިބުރިއާއި ދަނގަޑުބުރި ބޭނުންކޮށްގެން ހިންގި މާރާމާރީތައް މިހާރު ކަނޑިފަދަ ތަކެއްޗާއި، ހަށިގަނޑުގައި ފޮރުވާލެވިފައިވާ ތޫނު ހަތިޔާރު ބޭނުންކޮށްގެން ހިންގާކަން ފުލުހުން ފާހަގަކުރެއްވިއެވެ. ގޭންގުތަކުން މީހުން މެރުމަށް ކުރިން ވިސްނިނަމަވެސް، މިހާރު މީހުން މަރާނުލައި އެ ގޭންގުތަކުގެ އިސް ފަރާތްތަކުން ވާހަކަދައްކައިގެން މައްސަލަތައް ހައްލުކުރުމަށް އިސްކަންދޭކަން ފާހަގަވާކަމަށް ފުލުހުން ވިދާޅުވިއެވެ. މިގޮތަށް ގޭންގުތަކުގެ ހަރަކާތްތައް ބަދަލުވެފައިވަނީ މައްސަލަތަކާ ގުޅިގެން ފުލުހުންގެ ފަރާތުން އެ ގޭންގުތަކުގައި ހަރަކާތްތެރިވާ މީހުންނަށް ކުރިމަތިވެދާނެ ނުރައްކަލަކަށް ވިސްނައިގެންކަމަށް ފާހަގަކުރޭކަމަށްވެސް ފުލުހުން ވިދާޅުވިއެވެ.
ގޭންގުތަކުގެ ޙަރަކާތްތައް އަތޮޅުތަކަށް ފުޅާވެގެން ގޮސްފައިވާއިރު، މެދުރާއްޖެ ތެރޭގައި 197 މީހަކު ގޭންގުތަކުގައ ހަރަކާތްތެރިވާކަމަށާ، އިސް ސަފުގައި 6 މީހަކު އަދި 3 ކުޑަކުދިން އުޅޭކަމަށް ފުލުހުން ވިދާޅުވިއެވެ. އަދި އެމީހުންގެ އާއިލާގެ ފަރާތްތަކުން ނުވަތަ އެހެން ބަޔަކުވެސް އެ ގޭންގުތައް ފުޅާކުރާނެކަމުގެ ބިރުވެރިކަން އޮތްކަމަށްވެސް ފުލުހުން ވިދާޅުވިއެވެ.
ގޭންގުތަކަށް އާމްދަނީ ހޯދުމަށް، ފުޅާދާއިރާއެއްގައި މަސްތުވާތަކެތީގެ ވިަޔަވާރި ކުރާކަމަށާއި، ދައުލަތުގެ ގުނަންތަކުގެ ތެރެއަށް ނުފޫޒާއިބާރު އަދިި ސިޔާސީ މީހުންނާ އޮންނަ ގުޅުންވެސް ފުޅާކުރަމުން އަންނަކަމަށް ފުލުހުން ވިދާޅުވިއެވެ. އަދި ވަކީލުންނަށް ބޯޑެތި ޢަދަދުތަކުން ފައިސާދީގެން ޝަރުޢީ ދާއިރާއަށް އަތްގަދަކުރުމަށްވެސް އެ ގޭންގުތަކުން މަސައްކަތްކުރާކަމަށް ފުލުހުން ވިދާޅުވިއެވެ.
ގޭންގުތަކަށް މީހުން ރެކްރޫޓްކުރުމަށް ކުރާ ގޮތުގެ ތަފްސީލް ހާމަކުރައްވަމުން ފުލުހުން ވިދާޅުވީ، މީސްމީޑިއާ ބޭނުންކޮށްގެން މީހުން ރެކްރޫޓްކުރުމުގެ މަސައްކަތާއި، މަގުތައްމަތީގައިވެސް މީހުން ރެކްރޫޓްކުރުމުގެ މަސައްކަތްކުރާކަމަށެވެ.
ގޭންގު ކުށުގެ މިހާރުގެ ޙާލަތު
- ތޫނު ހަތިޔާރު ބޭނުންކޮށްގެން މާރާމާރި ހިންގުން / ވާހަކަ ދައްކައިގެން ހައްލުކުރުން
- މަސްތުވާތަކެތީގެ ވިޔަފާރިކުރުން
- ކުށްކޮށްގެން ހޯދާ ފައިސާއިން ވިޔަފާރި ފަށައި ފުޅާކުރުން
- މީސްމީޑިއާގައި ގޭންގު ޕްރޮމޯޓްކުރުން
- ސްޕޯޓްސް ކްލަބް ރަޖިސްޓަރ ކުރުން
- ރެކްރޫޓްމަންޓް
ގޭންގުތަކުގެ ނުފޫޒާއި ބާރުވެރިކަން
- ސިޔާސީ ފަރާތްތަކާ އޮންނަ ގުޅުން
- ދައުލަތުގެ އެކި ގުނަންތަކަށް އިންފިލްޓްރޭޓް ކުރުން
- ޝަރުޢީ މަރުޙަލާގައި ކުރިއަށްގެންދާ މައްސަލަތަކަށް ނުފޫޒު ފޯރުވުން
- ގްރޫޕްތަކުން މާލީ ތަނަވަސްކަން ހޯދުން
މިހާތަނަށް ގޭންގު މާރާމާރީތަކުގައި 31 މީހަކު މަރާލާފައިވާކަމަށް ފުލުހުން ވިދާޅުވިއެވެ. އޭގެތެރޭގައި 9 ކުޑަކުދިން ހިމެނޭއިރު، އޮޅިގެން ގޭންގު ކުށްތަކަށް ނިސްބަތްނުވާ 6 މީހަކު މަރާލާފައިވާކަމަށްވެސް ފުލުހުން ވިދާޅުވިއެވެ.
ފުލުހުން ވިދާޅުވީ ގޭންގު މާރާމާރީތައް މިހާރު ވަރަށް މަދުކުރެވިފައިވާކަމަށެވެ. އެގޮތުން ގޭންގު އެކްޝަން ޕްލޭނެއް އެކުލަވާލައިގެން ގޭންގުކުށްތައް ހުއްޓުވައި މަދުކުރުމަށް މަސަސއްކަތް ކުރާކަމަށްވެސް ފުލުހުން ވިދާޅުވިއެވެ.
ނޭޝަނަލް އެކްޝަން ޕްލޭން
- ގޭންގުކުށްތައް ހުއްޓުވުމަށް ކުރު ރާސްތާ އަދި މެދު ރާސްތާ އެކްޝަން ޕްލޭނެއް އެކުލަވާލުން
- ފުލުހުންނާއި ސިފައިން ގުޅިގެން ކުރިއަށް ގެންދާ ޚާއްޞަ އޮޕަރޭޝަން
- ޢާންމުން ހޭލުންތެރިކުރުވުން
- ކުޑަކުދިން ކުށުން ސަލާމަތްކުރުން
- ކުށާ ގުޅުންހުރި ޤާނޫނުތައް އިސްލާހުކުރުން
- ދިގުލައިގެން ގޮސްފައިވާ މައްސަލަތަކުގެ ޝަރިޢަތް އަވަސްކުރުން
ދުނިޔޭގެ ބޮޑެތި ޤައުމުތަކުގައި ގޭންގުތަކުން އަރައިގަންނަ ކުށްތަކަށް ރާއްޖޭގައި ހަރަކާތްތެރިވާ ގޭންގުތަކުވެސް އަރައިގަންނަމުން އަންނަކަމަށާ، ގޭންގުތަކަށް މީހުން ތަމްރީނުކުރުމުގެ ހަރަކާތްތައް ފަޅު ރަށްރަށުގައި ހިންގަމުން އަންނަކަމަށްވެސް ފުލުހުން ވިދާޅުވިއެވެ.
ގޭންގު ކުށްތައް ހުއްޓުވުމަށްޓަކައި ސަރުކާރުން އަންނަނީ ޚާއްސަ މަސައްކަތްތަކެއް ކުރައްވަމުންނެވެ. އެގޮތުން ރާއްޖޭގައި ގޭންގުތަކުން ކުށްކުރުމުގެ މާޙައުލާއި އެކަމެ ޙާލަތު އޮތްގޮތުގެ ދިރާސާތައް ކުރައްވައި ޚާއްސަ ފިޔަވަޅުތަކެއް އަންނަނީ އަޅުއްވަމުންނެވެ.