ފަސްކުރެވިފައިވާ ޑިމޮކްރަސީ ހަފްތާ އަންނަ މަހުގެ ސާދައިން ވިއްސަށް ކުރިއަށް ގެންދިއުމަށް އިލެކްޝަންސް ކޮމިޝަނުން ނިންމަވައިފިއެވެ.
ރާއްޖޭގައި ފުރަތަމަ ފަހަރަށް ފާހަގަކުރުމަށް ހަމަޖެހިފައިވާ ޑިމޮކްރަސީ ހަފްތާ ކުރިން ފާހަގަކުރުމަށް ހަމަޖެހިފައި އޮތީ މިދިޔަ އޮކްޓޫބަރު މަހުގެ 4 ން 10 ކަށެވެ. އިލެކްޝަންސް ކޮމިޝަންގެ މެމްބަރު އަޙްމަދު އަކްރަމް ވިދާޅުވީ، ރާއްޖޭގެ ހުރިހާ ސަރަހައްދެއްގައި ޑިމޮކްރަސީ ހަފްތާ އަންނަ މަހުގެ 14 ން 20 އަށް ފާހަގަކުރެއްވުމަށް ނިންމަވާފައިވާ ކަމަށާއި، މުހިއްމު ހަރަކާތްތައް ފެބުރުއަރީ 16 އިން 20 ކުރިއަށް ގެންދަވާނީ ކުރިންވެސް ނިންމަވާފައިވާގޮތަށް ތިލަދުންމަތީ އުތުރުބުރީ ހޯރަފުށީގައި ކަމަށެވެ. ޑިމޮކްރަސީ ހަފްތާގެ ޙާއްސަ ރަސްމިއްޔާތުވެސް ބޭއްވުމަށް ހަމަޖެހިފައިވަނީ ތިލަދުންމަތީ އުތުރުބުރީ ހޯރަފުށީގައެވެ.
ރާއްޖޭގައި ފުރަތަމަ ފަހަރަށް ފާހަގަކުރާ ޑިމޮކްރަސީ ހަފްތާގެ ޙާއްސަ ރަސްމިއްޔާތުގައި ދައުލަތުގެ އިސް ފަރާތްތަކުން ބައިވެރިވެ ވަޑައިގަތުމަށް ހަމަޖެހިފައިވެއެވެ. މިރަސްމިއްޔާތަށް ބައެއް ޤައުމުތަކުގެ އިސްވެރިންވެސް ރާއްޖެ ވަޑައިގަތުމަށް ހަމަޖެހިފައިވާކަމަށް އަކްރަމް ވިދާޅުވިއެވެ. ހޯރަފުށީގައި ފާހަގަކުރާ ޑިމޮކްރަސީ ހަފްތާގައި އެ ކޮމިޝަނުގެ އާ ލޯގޯ އާއި އެ ކޮމިޝަނުން ބޭނުން ކުރާ ކުލަ އިފްތިތާހުކުރުމާއި، އަލަށް ފާހަގަކުރަން ފަށާ ވޯޓުލާ މީހުންގެ ދުވަހާއި، އިލެކްޝަންސް ކޮމިޝަނުގެ އަހަރީ ދުވަސް ފާހަގަކުރަން ހަމަޖެހިފައިވާ ދުވަސް އިޢުުލާން ކުރުންވެސް ކުރިއަށް ދާނެކަމަށް އެކޮމިޝަނުން މައުލޫމާތުދެއްވައެވެ.
ޑިމޮކްރެސީ ހަފްތާގެ ތީމައަކީ، "ޑިމޮކްރެސީގައި އެންމެންގެ ބައިވެރިވުން" އެވެ.
މިތީމްގެ ދަށުން ސަރުކާރުގެ މުއައްސަސާތަކާއި އަމިއްލަ ޖަމްޢިއްޔާ ޖަމާޢަތްތަކުންނާއި ސިޔާސީ ޕާޓީތަކުން ޑިމޮކްރަސީގައި އަދާކުރާ ދައުރާއި ގުޅޭގޮތުން އާންމުން އަހުލުވެރި ކުރުމާއި، މައުލޫމާތު ދިނުމަށް ހަމަޖެހިފައިވެއެވެ. ޑިމޮކްރަސީ ހަފްތާގެ މީޑިއާ ޕާޓްނަރަކީ ޕަބްލިކް ސާވިސް މީޑިއާ، ޕީއެސްއެމްއެވެ.