އިތުބާރު ހިފޭ މަޤާމެއްގައި ހުރި މީހަކު ކުޑަކުއްޖަކަށް އަނިޔާކުރި މައްސަލައެއް ބަލަން ފަށައިފި

މެދު ރާއްޖެތެރޭގެ ރަށެއްގައި 12 އަހަރުގެ ކުއްޖަކަށް އިތުބާރުކުރެވޭ މަޤާމެއްގައި ހުރި މީހަކު އަނިޔާކުރި މައްސަލައެއް ފުލުހުން ތަހުގީގްކުރަން ފަށައިފިއެވެ.

ފުލުހުން ވިދާޅުވީ، ނޯތު ސެންޓްރަލް ޕޮލިސް ރީޖަންގައި ހިމެނޭ ރަށެއްގައި 12 އަހަރުގެ ފިރިހެން ކުއްޖަކަށް، އިތުބާރުކުރެވޭ މަޤާމެއްގައި ހުރި މީހަކު އަނިޔާކުރިކަމުގެ މައްސަލައެއް މިމަހުގެ 26 ވަނަ ދުވަހު ފުލުހުންނަށް ހުށައަޅާފައިވާކަމަށެވެ.

ފުލުހުން ވިދާޅުވީ، އަނިޔާ ލިބުނު ކުއްޖާގެ ހާލު ރަނގަޅުކަމަށާއި، އެކުއްޖާ މިހާރު ރައްކާތެރި މާހައުލަކަށް ބަދަލުކޮށްފައިވާކަމަށެވެ. މި މައްސަލައާއި ގުޅިގެން މިހާތަނަށް މީހަކު ހައްޔަރުކޮށްފައިނުވާކަމަށްވެސް ފުލުހުން ވިދާޅުވިއެވެ. މި މައްސަލަ ޖެންޑަރ މިނިސްޓްރީއާއި ގުޅިގެން ތަހްގީގްކުރަމުން އަންނަކަމަށްވެސް ފުލުހުން ވިދާޅުވިއެވެ.

ކުޑަކުދިންނާއި ގުޅޭ މައްސަލަތަކަކީ ސީރިއަސް މައްސަލަތަކެއްކަމަށް ޤާނޫނުގައި ބަޔާންކޮށްފައިވާތީ، މިފަދަ މައްސަލަތަކުގައި ހިމެނޭ ކުޑަކުދިންގެ އަތޮޅާއި ރަށާއި، އެނޫންވެސް ޒާތީ މަޢުލޫމާތުތައް ފުލުހުން ހާމައެއް ނުކުރެއެވެ.