ރާއްޖޭގައި ޗެކް ބޭނުންކުރާ މިންވަރު މަދުކުރުމަށް އެމްއެމްއޭއިން ކަނޑައަޅާފައިވާ އެކްޝަން ޕްލޭން ތަންފީޒު ކުރުމުގެ އަމަލީ މަސައްކަތް، ބޭންކުތަކާއި ގުޅިގެން މި އަހަރުގެ ޖޫން މަހު ފެށުމަށް އެމްއެމްއޭއިން ނިންމައިފިއެވެ. އެމްއެމްއޭއިން ބުނީ ދިވެހިރާއްޖޭގައި ޕޭމަންޓްގެ ޚިދުމަތް އަވަސް އަދި ލުއިފަސޭހަ ގޮތެއްގައި ކުރެވޭނެ އިންތިޒާމްތައް ހަމަޖެއްސުމުގެ ގޮތުން، ނަގުދު ފައިސާ އާއި ޗެކު ބޭނުންކުރުން މަދުކޮށް ޑިޖިޓަލް ޕޭމަންޓް ޚިދުމަތްތައް ބޭނުންކުރާ މިންވަރު އިތުރުކުރުމަކީ އެ އޮތޯރިޓީން ވަރަށް ބޮޑު އަހައްމިއްޔަތުކަމެއް ދީގެން ކުރަމުންދާ މަސައްކަތެއްކަމަށެވެ.
އެމްއެމްއޭއިން ވަނީ 2024 ވަނަ އަހަރުގެ ޖޫން މަހުގެ ނިޔަލަށް ރާއްޖޭގައި ޕޭމަންޓް މުޢާމަލާތްތައް ކުރުމަށް ޗެކު ބޭނުންކުރުން މަދުކުރުމުގެ މަޤުޞަދުގައި އެމްއެމްއޭ އާއި ބޭންކްތަކާ ގުޅިގެން 2021 ވަނަ އަހަރު ތެރޭގައި ވަނީ އެކްޝަން ޕްލޭނެއް އެކުލަވާލާފައެވެ. ދެ އަހަރުގެ މުއްދަތަކަށް އެކުލަވާލާފައިވާ މިއެކްޝަން ޕްލޭން ތަންފީޒު ކުރުމުގެ އަމަލީ މަސައްކަތް، ބޭންކުތަކާއި ގުޅިގެން މި އަހަރުގެ ޖޫން މަހު ފެށުމަށް އެ އޮތޯރިޓީން ވަނީ ނިންމާފައެވެ.
މި އެކްޝަން ޕްލޭންގެ މަޤުޞަދުތައް ހާސިލްކުރުމަށްޓަކައި އެޅިދާނެ ފިޔަވަޅުތައް ދެނެގަތުމަށްޓަކައި ބޭންކުތަކާއިއެކު ވަނީ މަޝްވަރާތަކެއް ކުރެވިފައެވެ. އެގޮތުން ކުރެވުނު މަޝްވަރާތަކުގެ އަލީގައި އެކުލަވާލެވުނު މި އެކްޝަން ޕްލޭންގެ ދަށުން އެކި މަރުހަލާތަކަށް ބަހާލައިގެން ފިޔަވަޅުތައް އެޅުމަށްވަނީ ނިންމާފައެވެ. އެ ފިޔަވަޅުތަކުގެ ތެރޭގައި 2023 ވަނަ އަހަރުގެ ދެވަނަ ކުއާޓަރ އިން ފެށިގެން ދިވެހިރާއްޖޭގައި ޗެކު ބޭނުންކޮށްގެން މުޢާމަލާތްކުރެވޭނެ އެންމެ މަތީ ޢަދަދަކީ ދިވެހި ރުފިޔާއިން ނަމަ 50،000، އަދި ޔޫއެސް ޑޮލަރުން ނަމަ 3،000 ކަމުގައި ކަނޑައެޅުމާއި، އެމްއެމްއޭއިން މިހާރު ދެމުންދާ ޗެކް ކްލިއަރިންގެ ޚިދުމަތްދޭ ދުވަސްތައް، ދެ މަރުހަލާއަކަށް ބަހާލެވިގެން މަދުކުރުން ހިމެނެއެވެ.
އެމްއެމްއޭއިން މިހާރު ދެމުންދާ ޗެކް ކްލިއަރިންގެ ޚިދުމަތްދޭ ދުވަސްތައް
- 2023 ވަނަ އަހަރު ގެ ދެވަނަ ކުއާޓަރ އިން ފެށިގެން ހަފްތާއަކު 2 ދުވަސް
- 2024 ވަނަ އަހަރުގެ ފުރަތަމަ ކުއާޓަރ އިން ފެށިގެން ހަފްތާއަކު 1 ދުވަސް
މީގެއިތުރުން އޮޓޮމޭޓަޑް ކްލިއަރިންގ ހައުސް (އޭސީއެޗް) މެދުވެރިކޮށް، ދިވެހި ރުފިޔާއިން ޕްރޮސެސް ކުރަމުން އަންނަ ހުރިހާ އިންޓަބޭންކް އެކައުންޓް ޓްރާންސްފަރ މުޢާމަލާތްތައް ހިމެނެއެވެ. އަދި 2023 ވަނަ އަހަރުގެ 3 ވަނަ ކުއާޓަރ އިން ފެށިގެން، އަލަށް ޤާއިމުކުރެވޭ އިންސްޓަންޓް ޕޭމަންޓް ސިސްޓަމް މެދުވެރިކޮށް ކުރުމުގެ އިތުރުން ޕޭމަންޓް ހެދުމަށް ޗެކު ބޭނުންކުރާ މިންވަރު މަދުކޮށް ޑިޖިޓަލް ވަޞީލަތްތައް ބޭނުންކުރުމަށް ބާރު އެޅުމުގެ ގޮތުން 2023 ވަނަ އަހަރުގެ ފަހު ކުއާޓަރ އިން ފެށިގެން ޗެކު ޕްރޮސެސްކުރުމަށް ފީއެއް ތަޢާރަފްކުރުމަށް ވަނީ ނިންމާފައެވެ.
މީގެ އިތުރުންވެސް، ބޭންކުތަކުން އެފަރާތުގެ ކަސްޓަމަރުންނަށް ފޯރުކޮށްދޭ ޚިދުމަތްތައް ޑިޖިޓަލް ވަޞީލަތްތައް މެދުވެރިކޮށް ފަސޭހަކާމާއެކު ބޭނުން ކުރެވޭނެ އިންތިޒާމްތައް ހަމަޖެއްސުމަށާއި ޑިޖިޓަލް ވަޞީލަތްތައް ބޭނުންކުރުމަށް އެފަރާތުގެ ކަސްޓަމަރުން އަހުލުވެރި ކުރުވާ ހޭލުންތެރި ކުރުވުމަށް ވެސް ބޭންކުތަކަށް ވާނީ އަންގާފައެވެ.
ބޭންކުތަކާއި ގުޅިގެން މި އެކްޝަން ޕްލޭން މިދިޔަ އަހަރު އެކުލަވާލާފައިވާ އިރު، 2020 ވަނަ އަހަރު ހަމަ މި މަޤުޞަދުގައި ސަރުކާރުގެ އިދާރާތަކާއި، ސަރުކާރު ހިއްސާވާ ކުންފުނިތަކާއި ބޭންކުތަކުން ޗެކު ބޭނުންކުރާ މިންވަރު މަދު ކުރުމަށް އެޅުނު ތަފާތު ފިޔަވަޅުތަކުގެ ސަބަބުންވެސް، އެދެވޭ ނަތީޖާތަކެއް ނެރެވިފައިވާކަން އެމްއެމްއޭއިން ފާހަގަކުރެއެވެ.