އެމެރިކާ ސިފައިން ހިންގާ މަޝްހޫރު ގުއަންޓެނާމޯ ޖަލުގައި ހައްޔަރުކޮށްފައިވާ ގައިދީންގެ އަދަދު ދުއިސައްތަ ސާޅީސް ދެއަކުން ނުވަދިހަ ތިނަކަށް ތިރި ކުރެވިއްޖެކަމަށް ވައިޓް ހައުސް އިން ހާމަކޮށްފިއެވެ.ވައިޓް ހައުސްގެ ތަރްޖަމާން ޖޯޝް އާނެސްޓް ވިދާޅުވީ މިއީ ގުއަންޓެނާމޯ ޖަލު ބަންދުކުރުމަށް ރައީސް ބަރަކް އޮބާމާ ގެންގުޅުއްވާ ސިޔާސަތުގެ ދަށުން އޮބާމާގެ ވެރިކަމުގައި ހާސިލް ކުރެވުނު ކާމިޔާބީއެއް ކަމަށެވެ.ގުއަންޓެނާމޯ ޖަލުގައި މިހާރުތިބި 93 މީހުންގެ ތެރެއިން 34 މީހުން އެމީހުންގެ ޤައުމުތަކަށް ނޫނީ އެހެން ޤައުމުތަކަށް ބަދަލުކުރުމަށް ނިންމާފައިވާ ކަމަށާ މިއީ އެޖަލު ބަންދުކުރުމަށް އަޅަމުންދާ ފިޔަވަޅުތަކުގެ ތެރެއިން ފިޔަވަޅެއްކަމަށް އާނެސްޓް ވިދާޅުވިއެވެ. އެމެރިކާ ސިފައިން ހިންގާ ގުއަންޓެނާމޯ އަސްކަރީ ޖަލަކީ ގައިދީންނަށް އަނިޔާކުރުމާއި އެމީހުންގެ އިންސާނީ ހައްގުތަކަށް އަރައިގަތުމުގައި ދުނިޔެއަށްވެސް ނަން މަޝްހޫރު ޖަލެކެވެ.އެމެރިކާ ވަނީ ޝަރީޢަތަކާ ނުލައި އެތަށް ސަތޭކަ ބަޔަކު ދިގުމުއްދަތަކަށް މިޖަލުގައި ހައްޔަރުކޮށްފައެވެ. މިޖަލު ބަންދުކުރާނެކަމުގެ ވަޢުދާއެކު ވެރިކަމަށް ވަޑައިގެންނެވި އެމެރިކާގެ ރައީސް ބަރަކް އޮބާމާއަށް މިކަމުގައި އެމެރިކާގެ އެތެރޭން ބޮޑެތި ފިއްތުންތަކެއް ކުރިމަތިވަމުންދާކަމަށް ރިޕޯޓްތައް ބުނެއެވެ.