އިންޑިއާއިން ރާއްޖެއަށް ވެދެމުން އަންނަ އެހީތެރިކަމަކީ ރާއްޖޭގެ ވެރިކަމުގައި ތިބެނީ ކޮން ބައެއްތޯ ނުވަތަ ކޮން ޕާޓީއެއްގެ ބައެއްތޯ ބެލުމެއްނެތި ވެދޭ އެހީތެރިކަމެއްކަމަށާއި، އެކަން ނޭޝަނަލް ކޮލެޖް އޮފް ލޯ އެންފޮސްމަންޓްންޓް އިން ހާމަކޮށްދޭކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ އައްޑޫގައި ޤާއިމްކޮށްފައިވާ ނޭޝަނަލް ޕޮލިސިން އެންޑް ލޯ އެންފޯސްމަންޓް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ނޭޝަނަލް ޕޮލިސިން އެންޑް ލޯ އެންފޯސްމަންޓް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، އައްޑޫގައި ޤާއިމްކޮށް ހުޅުވި މި ކޮލެޖަކީ ފުލުހުންގެ ޚިދުމަތް ތަރައްޤީކުރުމަށް މުހިންމު ތަނަކަށް ވެގެންދާނެކަމަށެވެ. ރައީސް ވަނީ މި ކޮލެޖު ޤާއިމްކުރުމުގައި އިންޑިއާ ސަރުކާރުން ވެދިން ދީލަތީ އެހީތެރިކަން ފާހަގަކުރައްވާ އެޤައުމުގެ ސަރުކާރަށް ޝުކުރު އަދާކުރައްވާފައެވެ.
ރައީސްގެ ވަހަކަފުޅުގައި ވަނީ އިންޑިއާއިން ވެދޭ އެހީތެރިކަމަކީ ސީދާ ދިވެހި ރައްޔިތުންނާއި، ރާއްޖޭގެ ތަރައްޤީއަށް ވެދޭ އެހީއެއްކަން ފާޙަގަކުރައްވާފައެވެ. އޭގެ ހެކިތައް ފެންނަން ހުރިކަމަށް ވިދާޅުވެ، އިންޑިއާގެ އެހީގައި ރާއްޖޭގައި ހިންގާފައިވާ އަދި ހިނގަމުންދާ ބައެއް ބޮޑެތި މަޝްރޫޢުތައް ރައީސް ފާހަގަކުރެއްވިއެވެ. އޭގެ ތެރޭގައި އައިޖީއެމްއެޗް، ޤައުމީ ޔުނިވާސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް، 34 ރަށުގެ ފެނާ ނަރުދަމް ޤާއިމްކުރުމާއި، ތިލަ މާލެ ބްރިޖް މަޝްރޫޢުއާއި، އައްޑޫ ގަން އިންޓަރނޭޝަލް އެއަރޕޯޓް ތަރައްޤީކުރުމާއިިި، ހަނިމާދޫ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢުއާއި، އައްޑޫ ސިޓީ ބިން ހިއްކާ މަގު ހެދުމުގެ މަޝްރޫޢުއާއި، ޤައުމީ ދިފާޢީ ބާރުގެ ކޯސްޓްގާޑާ ތިލަފުށީ ފެސިލިޓީފަދަ މަޝްރޫޢުތައް ރައީސް ފާހަގަކުރެއްވިއެވެ.
ރައީސް ވިދާޅުވީ، އިންޑިއާއިން ފޯރުކޮށްދޭ އެހީތެރިކަމަކީ ރާއްޖޭގެ ވެރިކަމުގައި ތިބީ ކޮން ބައެއްތޯ ނުވަތަ ކޮންޕާޓީއެއްތޯ ބެލުމެއްނެތި ވަމުން އަންނަ އެހީތެރިކަމެއްކަމަށެވެ. އެގޮތުން މި ކޮލެޖަކީ އޭގެ މިސާލެއްކަމަށް ރައީސް ވިދާޅުވިއެވެ.
ރައީސް ވިދާޅުވީ މި މަޝްރޫޢުގެ އެންމެ ފުރަތަމަ މަޝްވަރާތައް ފެށުނީ 2009 ވަނަ އަހަރުގެ ތެރޭގައިކަމަށެވެ. އެ މަޝްވަރާތަކަށްފަހު ޕޮލިސް އެކަޑަމީ ޤާއިމްކުރުމަށް ޅ.ދިއްފުށީމާދޫއާއި، ޅ.މާބިންހުރާއާއި، ދ.ވާނީއަށް މަޝްރޫޢު ހިންގަން ޕްލޭން ކުރެވުނުނަމަވެސް އައްޑޫގެ މަރަދޫއާއި ހިތަދޫ ގުޅޭ ސަރަހަދާށް މަޝްރޫޢު ބަދަލުކުރީ ކުރީ ސަރުކާރުންކަމަށެވެ. އަދި މި މަޝްރުޢުގެ ޢަމަލީ މަސައްކަތް ފެށީ 2017 ވަނަ އަހަރުގެ ޖުލައިމަހުކަމަށްވެސް ރައީސް ފާހަގަކުރެއްވިއެވެ.
ރައީސް ވަނީ ޕޮލިސް އެކަޑަމީ ހުޅުވުމާއި ހަމައަށް ގެނެވުނީ ކުރީގެ ސަރުކާރުތަކުގެ ވަރަށް ބޮޑު އެއްބާރުލުމަކާއި އެހީތެރިކަމެއްގައިކަން ފާހަގަކުރައްވާ ކުރީގެ ރައީސް ޢަބްދުﷲ ޔާމީނާއި، ކުރީގެ ރައީސް ޑރ.މުޙައްމަދު ވަޙީދު ޙަސަން މަނިކާއި، ކުރީގެ ރައީސް މުޙައްމަދު ނަޝީދުގެ ނަންފުޅު ފާހަގަކުރައްވާ ޝުކުރު އަދާކުރައްވާފައެވެ.
ރައީސް ވިދާޅުވީ، މީހުން ދިރިއުޅޭ ހުރިހާ ރަށެއްގައި ފުލުހުންގެ ޚިދުމަތް ފެށުމަކީ އެމަނިކުފާނުގެ ސަރުކާރުގެ މުހިންމު ވަޢުދުފުޅެއްކަމަށެވެ. ކޮންމެ ޤައުމެއްގައިވެސް ފުލުހުންގެ ޚިދުމަތަކީ ރައްޔިތުންނާ ގާތުން މަސައްކަތްކުރާ އަދި ޤައުމުގެ އަމާންކަމާ ސުލްހަމަސަލަސްކަން ގެނެސްދޭ ބައެއްކަމަށެވެ. އެހެންކަމުން ފުލުހުންގެ ޚިދުމަތް ރައްޔިތުންނާއި ގާތުން ދިނުމަށް ޚާއްޞަ ތަމްރީންތަކެއް ދޭންޖެހޭކަމަށެވެ. އެހެންކަމުން މި އެކަޑަމީއަކީ އެކަމަށް ލިބުނު ވަރަށް މުހިންމު ފުރުޞަތެއްކަމަށް ރައީސް ފާޙަގަކުރެއްވިއެވެ.
ރައީސްގެ ވާހަކަފުޅުގައި މި ކޮލެޖުގައި ޒަމާނީ ހުރިހާ ވަސީލަތްތައް ޤާއިމްކޮށްފައިވާކަން ފާހަގަކުރައްވާ ފުލުހުންގެ ޚިދުމަތަކީ ޑިމޮކްރެޓިކް އުސޫލްތަކާއި ބެސްޓް ޕްރެކްޓިސަސް ހިމަނައިގެން ދޭ ތަމްރީންތަކަކަށްވާނެކަމަށް ވިދާޅުވިއެވެ.