އައްޑޫ ސިޓީގައި 107 ކިލޯމީޓަރު މަގުގައި ތާރުއަޅައިގެން ޒަމާނީ ފެންވަރަށް ތަރައްޤީކުރުމުގެ ބިޔަ މަޝްރޫޢު ރަސްމީކޮށް ފަށްޓަވައިފިއެވެ. މި މަޝްރޫޢު ފަށްޓަވައިދެއްވީ އައްޑޫ ހިތަދޫ ސްކޫލް ސަރަހައްދުގައި ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އިންޑިއާގެ އެކްސްޓަރނަލް އެފެއަރޒް މިނިސްޓަރ ޑޮކްޓަރ ސުބްރަމާނިއަން ޖަޔަޝަންކަރުއެވެ.
އިންޑިއަން އެގްޒިމް ބޭންކްގެ 800 މިލިއަން ޔޫއެސް ޑޮލަރގެ ލައިން އޮފް ކްރެޑިޓް ފެސިލިޓީގެ ދަށުން ހިންގާ މި މަޝްރޫޢު ހަވާލުކޮށްފައިވަނީ އެފްކޯންސް އިންފްރާސްޓްރަކްޗަރ ލިމިޓެޑާއެވެ. 77.6 މިލިއަން އެމެރިކާ ޑޮލަރު ނުވަތަ 1.1 ބިލިއަން ދިވެހި ރުފިޔާ ޚަރަދުކޮށްގެން ހިންގާ މި މަޝްރޫޢު 730 ދުވަސް ތެރޭގައި ނިންމަންޖެހެއެވެ.
މި މަޝްރޫޢުގެ އެއްބަސްވުމުގައި ސޮއިކޮށްފައިވަނީ 21 ފެބްރުއަރީ 2021ގައެވެ. މި މަޝްރޫޢު ނިމޭނެކަމަށް ލަފާކޮށްފައިވަނީ
26 މެއި 2023 ގައެވެ.
މި މަޝްރޫޢުގެ ދަށުން އައްޑޫ ސިޓީގައި ފެންބޮޑުވުމުގެ މައްސަލައަށް ހައްލެއް ހޯދުމުގެ ގޮތުން އައްޑޫ ސިޓީ ފޭދޫ ފިޔަވައި އެހެން ހުރިހާ ރަށެއްގައި (ހިތަދޫ، މަރަދޫ، މަރަދޫފޭދޫ، ހުޅުދޫ އަދި މީދޫ) ފެން ހިންދާ ނިޒާމް ޤާއިމުކުރުމަށް ވަނީ ހަމަޖެހިފައެވެ. މިގޮތުން، ޤާއިމްކުރާ ފެން ހިންދާ ނިޒާމުގެ ޖުމްލަ ދިގުމިނަކީ ގާތްގަނޑަކަށް 105 ކިލޯމީޓަރެވެ.
މީގެ އިތުރުން މި މަޝްރޫޢުގެ ދަށުން އައްޑޫ ސިޓީ ހިތަދޫ، މަރަދޫ، މަރަދޫފޭދު، ފޭދޫ، ހުޅުދޫ އަދި މީދޫ ހިމެނޭގޮތަށް ޖުމްލަ 41.023 ކިލޯމީޓަރުގެ މަގުގައި ތާރު އަދި ގައު ހިމެނޭހެން ތަރައްޤީ ކުރުމަށް ވަނީ ނިންމާފައެވެ. އަދި ގާތްގަނޑަކަށް 67 ކިލޯމީޓަރުގެ މަގުގައި ސިމެންޓް ސްޓެބިލައިޒްޑް (ސީ.އެސް.ބީ) ލޭޔަރ އެޅުމަށް ވަނީ ހަމަޖެހިފައިވެއެވެ. މި ސީ.އެސް.ޑީ ލޭޔަރގެ މަޤްސަދަކީ ޤާއިމް ކުރެވޭ ފެންހިންދާ ނިޒާމުގެ ތެރެއަށް ވެލި އެޅި ދިމާވެދާނެ މައްސަލަތަކުން ރައްކާތެރިކުރުމެވެ.
މިހާރު ތާރުއަޅާފައިވާ މަގުތަކުގެ ތެރެއިން ޖުމްލަ 3.4 ކިލޯމީޓަރު މަގުގެ ރީސަރފޭސިންގ މަސައްކަތް ކުރުމަށްވެސް މި މަޝްރޫޢުގެ ތެރޭގައި ވަނީ ހިމަނާފައެވެ. ޕްލޭނިން މިނިސްޓްރީން ބުނީ ތަރައްޤީކުރެވޭ މަގުތަކުގައި މަގުބައްތި، ސީސީޓީވީ ކެމަރާ އާއި ރައްކާތެރިކަމުގެ އެހެނިހެން ފިޔަވަޅުތައް ޤާއިމްކުރެވޭނެކަމަށެވެ.
މިމަޝްރޫޢުގެ ދަށުން ސިމެންޓް ސްޓެބިލައިޒްޑް ބޭސް (ސީ.އެސް.ބީ) ލޭޔަރ އެޅޭ މަގުތައް ތާރު ނުވަތަ ޕޭވަރ ބްލޮކް ގޮތުގައި އިތުރަށް ތަރައްޤީކުރުމަށާއި، މިމަޝްރޫޢުގައި ނުހިމެނޭ ބައެއް މަގުތައް ތަރައްޤީކުރުމަށް ހިމެނުމަށާއި، އަދި ފޭދޫގައި މިހާރު ޤާއިމުކުރެވިފައިވާ ފެންހިންދުމުގެ ނިޒާމުގައި ނުހިމެނޭ ސަރަޙައްދުތަކުގައި މިނިޒާމު ޤާއިކުރުމުގެ މަސައްކަތް އިންޑިއަން އެގްޒިމް ބޭންކުގެ އެމް.އޯ.ސީގެ ދަށުން ކުރިއަށް ގެންދިއުމަށް ޕްރޮޕޯސަލް ހުށަހެޅި މިހާރުވަނީ އެޕްރޫވަލް މަރުޙަލާގައިކަމަށްވެސް ޕްލޭނިން މިނިސްޓްރީން ވިދާޅުވިއެވެ.
މީގެ އިތުރުން މަގު ހެދުމުގެ މި ބޮޑު މަޝްރޫޢުގެ ދަށުން ޑީޓުއަރ 4 ލޭން ލިންކް ރޯޑް ހަންކެޑެ ހިމެނޭ ސަރަޙައްދުގައި މިހާރު ބޭނުންކުރަމުންދާ ލިންކް ރޯޑުގެ ހުޅަނގުން ހަންކެނޑެއަށް ނާރާ ގޮތަށް ހިތަދޫ ގައުކެޑިއާއި މަރަދޫއާއި ގުޅާލުމަށްޓަކައި 1.463 ކިލޯމީޓަރުގެ އައު 4 ލޭންގެ ޑީޓުއަރ ލިންކް ރޯޑެއް ޤާއިމްކުރުމަށްވެސް ވަނީ ނިންމާފައެވެ.