ޓެރަރިޒަމް ހުއްޓުވުމަށްޓަކައި މިސަރަޙައްދުގެ ޤައުމުތަކަށް އެކީގައި މަސައްކަތް ކުރެވިދާނެކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.އެމަނިކުފާނު މިހެން ވިދާޅުވީ ރައީސުލްޖުމްހޫރިއްޔާގެ އަރިހަށް ސްރީލަންކާގެ ޚާރިޖީ ވަޒީރު، މަންގަލަ ސަމަރަވީރައާއި ސްރީލަންކާގެ މާލީ ވަޒީރު، ރަވީ ކަރުނަނަޔަކެ ކުރެއްވި އިޙްތިރާމުގެ ޒިޔާރަތުގައި ވާހަކަފުޅު ދައްކަވަމުންނެވެ. މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި އޮތް މިބައްދަލުކުރެއްވުމުގައި ދިވެހިރާއްޖެއާއި ސްރީލަންކާއާއި ދެޤައުމުގެ ދެމެދުގައި އޮތް ޒަމާންވީ ގުޅުން އެކި ދާއިރާތަކުން އިތުރަށް ބަދަހިކުރެއްވުމާއި ބެހޭގޮތުން ރައީސުލްޖުމްހޫރިއްޔާ، ސްރީލަންކާގެ ޚާރިޖީ ވަޒީރާއި މާލީ ވަޒީރާއެކު މަޝްވަރާ ކުރައްވާފައިވެއެވެ.ދިވެހިރާއްޖެއަށް ޒިޔާރަތް ކުރެއްވުމަށް ދަޢުވަތު ދެއްވިކަމަށްޓަކައި ސްރީލަންކާގެ ޚާރިޖީ ވަޒީރު، ރައީސުލްޖުމްހޫރިއްޔާއަށް ޝުކުރު ދެންނެވިއެވެ. އަދި، ސްރީލަންކާގެ ފަރާތުންވެސް ދިވެހިރާއްޖެއާއި ދެމެދުގައި އޮތްގުޅުން ވަރުގަދަކުރުމަށްޓަކައި ކުރަންޖެހޭ ކަންކަމުގައި އެއްބާރުލެއްވުން ދެއްވާނެކަމުގެ ޔަޤީންކަން ސްރީލަންކާގެ ޚާރިޖީ ވަޒީރު، ރައީސުލްޖުމްހޫރިއްޔާއަށް އަރުވާފައިވެއެވެ.