ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު، އެންޓި-ކޮރަޕްޝަން ކޮމިޝަން، އޭސީސީއަށް 5 މެމްބަރުން އައްޔަންކުރައްވައި، މަޤާމުގެ ފަތްކޮޅު ދެއްވައިފިއެވެ.
އޭސީސީއަށް 5 މެންބަރަކު އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވި ނަންފުޅުތަކަށް ރައްޔިތުންގެ މަޖިލީހުން ރުހުންދެއްވީ މިދިޔަ ހޯމަ ދުވަހުއެވެ.
އެ ފަސް ބޭފުޅުންނަށް ރައީސުލްޖުމްހޫރިއްޔާ މިއަދު ވަނީ އޭސީސީގެ މެންބަރުކަމުގެ ފަތްކޮޅު އަރުވާފައެވެ. މަގާމުގެ ފަތްކޮޅު އެރުވުމުގެ ކުރިން އެބޭފުޅުން ވަނީ އޭސީސީގެ މެންބަރުކަމުގެ ހުވައި ރައީސުލްޖުމްހޫރިއްޔާގެ ކުރިފުޅުމަތީގައި ކުރައްވާފައެވެ. ހުވައި ލައިދެއްވީ އުއްތަމަ ފަނޑިޔާރު މުއުތަސިމް އަދުނާންއެވެ.
އޭސީސީއަށް ރައީސުލްޖުމްހޫރިއްޔާ އައްޔަންކުރެއްވި ފަސް މެންބަރުންނަކީ:
1- އަލްއުސްތާޛް އާދަމް ޝާމިލް، ރަތްވިލާގެ/ ތ. ވިލުފުށި
2- އަލްއުސްތާޛް އަބްދުއްސަލާމް ޢަލީ ހަވާ/ ށ. ނަރުދޫ
3- އަލްއުސްތާޛް ޠާހާ މުހައްމަދު، ކަޅިހާރުގެ/ އދ. މާމިގިލި
4- އަލްއުސްތާޛާ ޝަޒްނާ ހާޝިމް، ރިހިވިލު/ ހދ. ނޮޅިވަރަންފަރު
5- އަލްއުސްތާޛާ ޝިޔާމާ މުހައްމަދު، ނާރެސް/ ރ. ހުޅުދުއްފާރު
އޭސީސީއަށް ރައީސުލްޖުމްހޫރިއްޔާ އައްޔަންކުރެއްވި މި ފަސް މެންބަރުންނަކީ އޭސީސީގެ އިންވެސްޓަރުންގެ ގޮތުގައި މަސައްކަތްކުރެއްވި ބޭފުޅުންނެވެ. މިގޮތުން އާދަމް ޝާމިލްއަކީ އޭސީސީގައި އިންވެސްޓިގޭޓަރެއްގެ ގޮތުގައި ގިނަ ދުވަސްތަކެއް ވަންދެން މަސައްކަތްކުރެއްވި އިންވެސްޓި ގޭޓަރެކެވެ. އަދި ޢަބްދުއްސަލާމް ޢަލީ މިހާތަނަށް ހުންނެވީ އޭސީސީގެ އިންވެސްޓިގޭޓަރުންގެ ހެޑްގެ ގޮތުގައެވެ. މީގެ އިތުރުން ޠާހާ މުޙައްމަދަކީ ރައީސް އުފެއްދެވި ފްލެޓް ކޮމިޓީގެ މެންބަރެވެ. އަދި ޝިޔާމާ މުޙައްމަދު މިހާތަނަށް ހުންނެވީ އިލެކްޝަންސް ކޮމިޝަންގެ ލީގަލް ޑިޕާޓްމަންޓްގެ ހެޑުގެ މަޤާމުގައެވެ
އޭސީސީއަށް ފަސް މެންބަރަކު އައްޔަންކުރައްވާފައި މިވަނީ، އޭސީސީގައި ކުރިން ތިއްބެވި ފަސް މެންބަރުން މަޤާމުން އިސްތިއުފާދެއްވުމާއި ގުޅިގެންނެވެ. ފަސް މެންބަރުން ހިމެނިވަޑައިގަންނަވާ އޭސީސީގެ މެންބަރުންގެ އިތުބާރު ނެތްކަމަށް މަޖިލީހުން ވޯޓް ނަގަން ތައްޔާރުވެފައިވަނިކޮށް ހުރިހާ މެންބަރުން ވަނީ އިސްތިއުފާދެއްވާފައެވެ. އަދި އެއަށްފަހު އެ ކޮމިޝަން މިހާތަނަށް އޮތީ ޤާނޫނީ ހުސްކަމެއްގެ ތެރޭގައެވެ.